Man ka por, la iohi ia ki prokram ot ribon, ki jingbuh maw nongrim ha kylleng ka Jylla bad ynda la dei ka por shong dorbar, la iohi ia bun bah ki jingiakren halor ka jingmang bad pynlut pisa ka sorkar ha ki tnat bapher; hynrei ka jingkylli ka wan hangne, ba shaei katei ka pisa ka leit bad la ka la pynmyntoi ne em ia u nongsiew khajna, uba hap ban siew rem dor ia ki tiar ki tar, tang namar jong ka khajna?
Ka jingshisha, ka long, ba lada phi tei ia ka dukan heh, uba myntoi ha khmat duh, u dei u kontraktor bad ki nongbylla jongu (lada dei ki nongbylla khasi ne ki nongbylla dkhar), katba ynda la dep tei, lada ka dukan ka iaid, ki myntoi sa kiba shong dukan, hynrei lada kam iaid, kumta kan shu dei noh tang ka jingtei nam jong ka sorkar.
Kumjuh ruh, haba trei ia ka surok (khamtam kum ha kine ki sngi, ba ka jot lut khait) kiba myntoi, ki dei ki kontraktor bad ki nongbylla jongki lem bad ki nongdie tiar die tar, hynrei lada katei ka surok, ka jot noh lane ka dei sha ki jaka bym don kali, kumta ki ioh kabu pynban sa ki nongleit bri leit bsah lane ki nongsharai blang sharai masi.
Haba ngi peit ha kine ki sngi, ngi iohi, ba ka jingtrei jong ka sorkar, kaba pynmyntoi shisha, ka dei ia ka skhim 100 sngi, ha kaba ki riew paidbah, ki iatei hi ia ki lynti iaid kjat, ia ki jaka sum, ia ki nala, ki kynroh bad kumta ter ter bad lait nangta, ka wan sa kawei ka skhim, kaba dang iaid bha ha kine ki sngi bad kata ka long ka jingtrei ia ki iing baduk, ha kaba ym don da kiwei pat kiba lushia, hynrei ki dei hi ki trai iing kiba rai ia ka jingheh ne jing itynnad jong ka iing, kiba siew hi ia ka bai misteri bad ba ki briew jong ka sorkar, ki shu peit bniah, ba ka kam kan iaid beit bad ba kan nym sahkut tang shiteng.
Kitei ki dei ki skhim jong ka sorkar India, hynrei kiba bun ki skhim, tang shu la aiti ha ka sorkar jylla, la iohi, ba ki ia tare kito kiba iajan bad ki minister bad ki ophisar bad kine kin pynpulom lut ia ki kam ba bun, da kaba kin bam kham bun ialade bad kin sa pynlut ia kaba tam bad dei na kata ka daw, ba ki kam kim ju iaid beit satia bad ki shu sahkut lane ki sniew noh tang shipor, namar ba ka jingpyntrei, ka dei kaba torti haduh katta katta bad kam dei tang katta, hynrei la iohi, ba ha kiba bun bah ki skhim jong ka sorkar jylla, ba ki paidbah kim ju don bynta ha kaba shna kamai ialade, namar la ju ai ia ki, tang ia kaba la dep lane kaba la pyntrei da kitei kontraktor lane ki ophisar jong ki tnat bapher.
Ka nuksa kaba biang tam ban iakren ia kane ka mat, ka dei ia kito ki skhim elekshon jong kane ka sorkar NPP, kiba ka la shu bret kai ha madan ha shwa ka elekshon 2023 bad kitei ki kynthup ia ka skhim iarap nongrep, kaba saw hajar, sa ka skhim sam khun syiar bad khun sniang, ka bym don jingmih eiei ruh em, hynrei kaba la shu pynkit khia ia u paidbah, ha kaba siew ia ki ram ki shah jong kiba kum kitei ki ram.
Kat haduh mynta ngim iohi ia kiwei pat ki skhim kiba ai kamai ia ki riew paidbah jongngi, lada dei ha ka rep, lada dei ha ka ri jingri, lada dei ha ka kam shang pyrthei; hynrei la shu pynlut phut ha ki jingtrei kiba heh ba heh bad kiba ailad ia ki heh spah heh hajar, katba kitei kin shu sah kum ki jaka teinam, lada ki paidbah kim ioh ban kamai bai sngi ialade, katba ia ka jinglut la shu leit shim da ka ram na ki Bank bapher jong ka pyrthei.
Phi don ban ong eiei?