Ba tuid ka tin ka NPP sha Gambegre, dei kaba shu thied ne dei na ka skhim, ong u Mukul

Shillong: U nongialam ka TMC Meghalaya u Dr. Mukul Sangma ula kam ba ka jingpynhiar tin sop ïing ka NPP ban sam sha ki longïing sha Gambegre constituency, ka jur bha ha kine ki sngi.
Haba kren sha ki lad pathai khubor, u Dr. Mukul u la ong ba ki paidbah ki dei ban tip, ha kano ka rukom ka NPP ka pynhiar tin da ki bun kali ban leit sam tin sha ki paidbah, hato ka dei kaba sam na kano kano ka skhim ne ka dei kaba shu thied nokot da mano mano.

Kane ka jingwohnia u Dr. Mukul ka long ba ka Gambegre constituency kan leit sha ka elekshon shiteng samoi shen hadien ba la iehnoh u Saleng A Sangma uba la jop kum u MP ka Tura.
U Dr. Mukul u la ong ula peit pyrman bha ia ka jinglong jingman ha Gambegre konstitwensi, bad ula iohi ba ki tnad sorkar baroh kila hiar sha constituency hapoh ka jingbthah ka party kaba don ha ka bor.

“Nga la peit pyrman ia ka jinglong jingman ha Gambegre constituency ha kine ki sngi bad la iohi ba ki tnad sorkar baroh kila shah bthah ban leit sha katei ka konstitwensi, ha kaba u Myntri Rangbah ruh dalade u la leh. Ngi la iohi ba ka la don ka jingsam tin sopïing sha kiba bun bah ki longïing. Hato kine ki tin ki dei kiba sam na ka skhim sorkar ne ki dei kiba shut hied?,”, la buh jingkylli u Dr. Mukul.
U Dr. Mukul ula kynnoh ba kane ka dei ka jingleh kutlad jong ka NPP kaba don ha ka bor ban jop ia ka elekshon, hynrei kan ym jop satia. “Kaei kaba jia ha ka Gambegre constituency, ka dei ka jingleh kutlad jong ka NPP ban jop ia katei ka constituency hynrei, ki paidbah kin ai ka rai kaba biang pyrshah ia ki (NPP)”, la ong u Dr. Mukul.

Lah ban kdew ba ka All India Trinamool Congress (TMC) kala rai ban pynieng ia ka MDC ba marwei ka GHADC ka Sadhiarani M Sangma kum ka kyrtong ha ka elekshon shiteng samoi jong ka Gambegre Constituency.
U Dr Mukul ula pyntip ba u President ka Pradesh Trinamool Congress Committee Bah Charles Pyngrope bad kiwei ki dkhot ka Election Committee kila dep shong bad iakren ia ki aplikeshon jong ka MDC ka party ka Dengnakpara Sadhiarani M Sangma, kaba dei ka kurim u para bad MLA barim ka Rangsakona Zenith M Sangma.
Ka NPP ka la rai ban pyniakhun ia ka lok u Myntri Rangbah u Conrad K Sangma ka Mehtab Chandee Sangma.