Ka jingkiew dor jong ki marbam mardih ha ka jylla

Ka jingkiewdor jongki marbam mardih kiba bun kiba don hapoh ka Jylla Meghalaya kum u khaw, ki jhur, ki soh, u phan, u pyiat kynthuplang haduh ka dohmasi, dohsniang ne dohkha kumjuh lada phai halor ka pylleng pham lem bad kiwei kiwei kumba ki paidbah ki ju pyndonkam manla ka sngi ka la pynlong haduh ban wanrah ia shibun ki jingeh kumba ki iakynduh ryngkatlang bad ka kamai kajih. Lada phai khamtam halor jongki longïing kiba duk ba kyrduh ka la pynlong kum ka jingiuh roit kaba ban beiñ iaki khlem dalah shuh ban iarap lem iaka jingdonkam jongki hala kajong ka Jylla kumba ka paw.

Lada kren ia kane kala paw shai kumba kala jia naduh kipor kumba 3 snem mynshuwa nalor ka jingwan lynshop jongka Khlam Covid-19 kaba dang wanrah shuh shuh ia shibun ki jingjynjar ia ki paidbah jongka Jylla halor kiba bun kat shaba phai kiliang da kaba ki iohi ba ka don ka jingrem dor shaba palat ha kaba ymlah shuh ban thied bun katkum ki jingdonkam manla ka sngi haduh kat mynta.
Nakaliang jongngi ka kynhun Meghalaya Awaken Concern Citizens (MACC) haba iohi ia kane halor kine ki sngi ba mynta watla ymshym la don ba kren la kalong kaba dei ne lait, hynrei ngi hap ban shim iaka rai ban mih shakhmat da jingsynran ki paidbah kiba don jingkitkhlieh na bynta ka lawei jongka longïing longsem khamtam lada phai na bynta jongki longdien mandien kiban sa wan ha ka ban shim iaka jingiatreilang ban ban synran da jingaiti bad aibuit aibor khlem da don kano kano ka jingpyrkhat bakla kum ki briew kiba dang im ha sla pyrthei.

Ka kynhun MACC kumba kala iaid lynti naduh ki sngi ba la leitnoh ban kren halor ka jingdie rem dor palat iaka MRP ia kiba bun ki Mardih lyngba ki Wine Store kiba don hapoh Shillong, bad mynta ka la pynlong shuh shuh ban iaid shakhmat ha kaban tih bniah iaka jing rem dor ki marbam ki bymdon MRP. Mynnin ka sngi la hap ban hiar hi da lade sha Iewduh ha kaban tih bniah halor kadaw bah kaba la pynlong iaka jingkiewdor ki marbam mardih hapoh ka Jylla. Shibun la shem i aka jingrem ha baroh ki liang kat shaba phai khamtam ha kaba iadei bad ki jhur, ki doh, ki soh, u khaw bad kiwei kiba bun haduh ymlah shuh ban sngewthuh ne wat ban buh jingkylli ia kane ka bynta. Haba shem kum ki jhur kiba bun kidei kiba mih napoh ka Jylla lajong bad balei pat haduh katne ki hap ban rem ka dor haduh wat ban thied iaki ruh ymsngew lah shuh bad hap ban thied da kiwei pat ki jhur kum u phan kiba iasyriem bad kiba wan nabar Jylla. U Phan Khasi la hap ban die kumba 50 tyngka shikilo bad u phan nabar jylla la die kumba 40 tyngka.

Kiba bun ki Jhur kum u Sohsaw, Kajor, Prisbin kiba la die haduh kumba 80 tyngka shikilo lem bad kiwei kiwei kynthup kat haduh u Sohmynken kidei kiba dangmih napoh ka Jylla lajong bad ka jingkylli mynta pat kalong ba kaei kadaw ban hap die rem dor noh ia kitei pat?. Kiei ki Tax kiba dang hap ban shim shibun na ki marbam kiba mih napoh ka Jylla lajong haduh ba ki nongdie ki hap ban die rem dor ia kine baroh.
Lada ngi phai halor ka Syiar Pham kiba bun ki mih na Jylla lajong hynrei ka pylleng pham, ka dohkha ka wan napoh Andhra Pradeh pynban la shem ba ka jingrem dor jongkine ki mar kalong kumjuh khlem da iapher. Kum u khaw ngi shem ba u wan lang na kiwei kiwei ki Jylla bad khambun napoh West Bengal bad ka dor lada phai shapoh kitei ki Jylla la shem baka dang biang palat ban nujor bad ka Jylla Meghalaya kaba pyndonkam iaki.

Ha kaba iadei bad ki soh kiba bun kidei kiba wan nabar Jylla bad ynda kipoi hapoh ka Jylla Meghalaya ki kylla rem dor ban die sha u paidbah, hynrei ka Jylla Meghalaya kadang ioh iaka nam kum ka Jylla kaba khlaiñ ban saphriang ia u Sohtrun, hynrei kaba sngewsih kalong ynda shem pat ia u sohtrun la sakhi lypa naduh ka Jylla lajong ba la die rem dor ia u bad katno tam un poi ka dor sha kiwei pat ki Jylla kiba don hapoh ka Ri India khlem pat da pyrkhat iar shabar jongkiwei ki Ri jongka pyrthei.
Kumba la pynpaw ba ki jhur kiba bun ki mih na jylla lajong hynrei la hap ban die rem dor noh ia ki baroh khlem da lah ban pynshai paidbah. Kum kiwei pat ki marbam kiba bun kiwan na bar jylla bad tang ynda kila poi hapoh ka Jylla Assam ka dor baroh ka la kylla lut bad kum kane ka mat kaba kongsan kalong ba kum ki paidbah Nongshong Shnong ha la kajong ka Jylla ngi hap ban sngewthuh bad shemphang halor kaei kadaw bah kaba la pynlong iangi manla iwei pa iwei ban nginhap ban buh jingkylli ha kaba iadei bad kane ka mat kaba kongsan bad ngimdei ban sngewpher lada dei kum ki briew kiba riewspah ne ba duk ruh, namar ban im ka jaidbynriew ngi donkam ban pyrkhat jylliew.

Kumta ha kaba iadei bad kane ka bynta kaba kongsan kumba la sakhi halor ka jingeh jong kiba bun ki paidbah jongka Jylla, nakaliang jongka kynhun MACC kan hap ban phah da ka jingthoh sha baroh 2 ngut ki Member of Perliament (MP), kumjuh lang sha baroh ki 60 ngut ki Member of Legislative Assembly (MLA) kiba don hapoh ka Jylla Meghalaya ha kaba kidei ban sngewthuh kumno ban pynbeit pynbha halor ka jingeh kaba iakynduh kum ki paidbah bad ba ka jingshakri ia ki paidbah kadei banlong kaba khuid ba shai bad ba dei ban rah ia kane ka mat ba kongsan hapoh kane ka Assembly Session kaba long mynta naka bynta ban shim khia ha kaban wanrah iaka jingpynbeit pynbha iaka dor halor kiba bun ki Marbam Mardih kiba rem dor (Price monitoring and evaluation for high price rates for food and others), namar baka jingkiew dor jongki marbam mardih baroh kaba la wanrah jingjynjar kaba long kum ka jingpang ia kiba bun ki paidbah kum ki nongthied ha kaba iadei ka u khaw, ka doh, u jhur, ki soh lem bad kiwei kiwei. Kane baroh kadei ban ai ka jingkyrshan markylliang ia baroh u paidbah uba long u Nongjied ban phah shapoh Assembly na bynta ban pyrkhatlang kumno ban im naduh uba riewspah haduh uba duk ruh kumjuh khlem da donkam ban thew shiliang da kaba wanrah ia ka lynti na ka bynta ban skhem lang halor kiba bun kiba donkam manla ka sngi khlem da pynjah burom ia la kajong ka Jylla ha kaba iadei kum u Paidbah baroh.

Na ka liang jongka kynhun MACC ka la shim ia ka rai ba dei ban phah ruh ia ka jingthoh shapoh ka Meghalaya State Consumer Disputes Redressal Commission kaba don hapoh ka Jylla Meghalaya lem kumjuh ban pynshai paidbah ha kaba iadei bad ka Consumer Protection Act, 1986 kumjuh haduh ka Meghalaya Consumer Protection Rules, 1989 lem bad kiwei kiwei ki department ha kaba iadei bad ki ki aiñ ki kyndon kiba lah ban pyrkhat ha kaba kumno ymlah ban iada naka bynta ka jingmyntoi kaba donkam jongki paidbah kiba im hapoh kajong ka Jylla Meghalaya.
Khublei Shibun
Ba burom iaphi

Bah Banshai Marbaniang,
Meghalaya Awaken Concern Citizen.