Ba thut palat ka bording ha Nongpoh, phah jingthoh ka NTC sha ka sorkar, ban pynkloi ia ka 132 KV Power Substation

Nongpoh, 24 Nailar: Haba shimkhia halor ka jinglip bording ba khah khah ka bording ha ka thain Nongpoh bad kaba la wanrah jingeh ia ki paidbah nongshong shnong, ki nongialam ka Nongpoh Town Committee (NTC), lyngba ki nongialam jong ka, kiba kynthup ia u Bah Successful Lyngdoh, Chairman bad u Bah Rayonald Kharkamni, Secretary, ki la phah jingthoh sha ka sorkar, na bynta ban kyntu ia ka sorkar ba ka dei ban pynkloi noh ha ka ban wanrah ia ka 132 KV Power Substation ha Nongpoh, khnang ba ki shnong ha ka thain Nongpoh, kin lait noh na kaba ki shait mad ia ka jinglip bording kaba khah khah.

Ha ka jingthoh ba ka NTC ka la phah sha ka sorkar jylla, ki la pynpaw ba ka NTC ka sngewkhia eh halor ka jingeh kaba la kynduh da ki paidbah, kiba la kynduh jingeh na ka jingthut ba palat ka bording ha ki shnong ka thain Nongpoh hi baroh kawei.

Ki la pynpaw ruh, ba ka jingthut ka bording, ka la ktah ia kiba bun ki trei lyngba ka bording bad kaba la pynlong ba bun ki kam ki jam ba kin sahkut lut, ym tang katta hynrei ka la ktah eh wat ia ki khynnah skul ruh kumjuh.

Shuh shuh, ki la pynpaw ruh ba ka daw hi kaba la pynlong ia ka jingthut palat ka bording ha Nongpoh, ka dei namar ia ka lain ban pynpoi bording sha Nongpoh, la shim naduh Stage III Power Station Kyrdemkulai, ha kaba ka jingjngai ka la kot sha ka 40 km kaba dei tang na ka bynta ka 33/11 KV power station.

Kumta , ka la shem jingeh ban pynkhuid ia ka lynti iaid jong katei ka bording haduh ban poi sha Nongpoh, kumta haba jia ki jingbeh lyer ne hap slap ne shah ktah ha ki bor mariang, ki paidbah ki la hap ban shongdum na ka daw ba ki tyngkhung ki dieng ki siej kiba ym lah ban pynkhuid na ka por sha ka por.

Namarkata, NTC lyngba ki nongialam, ki la kyrpad ia ka sorkar lyngba ka tnad MeECL ba kan shimkhia, ha ka ban pynurlong noh ia ka 132 KV Power Substation ha Nongpoh bad halor kata, shen ruh kin sa leit ban kynduh ia u Myntri Sorkar uba dei peit ia ka kam bording, khnang ban urlong katei ka 132 KV Power Substation, ba kan long ka jingmyntoi ym tang ia ka thain Nongpoh, hynrei ha ka Distrik hi baroh kawei.