Ki lai ngut ki MLA jong ka seng Congress, ki la leit pyniasoh ialade sha ka seng NPP bad ka ophis jong u lamphang dorbar jylla, ka shim, ba katei ka jingleit pyniasoh jong kitei ki lai ngut, ka la biang lut nadong shadong, katba kum ki kyndon jong ka ain kyntiap seng.
Hynrei kaba pynthut ia kitei ki laingut ki MLA, ka dei hadien ba ka Nongstoin Block Congress Committee (I), ka la thung bujli ia U President jong ka Block, tang mar ia shah sospon, U bah Gabriel Wahlang, uba dei U President jong ka Nongstoin Block bad u MLA jong katei ka Constituency bad nangta ka mih sa ka Umsning Block Congress, kaba la kren shai, ba U Dr Celestine, um shym la iasyllok ba un leit iasoh NPP, hynrei, ula pyntip ia ka Block, ba un shu leit iatreilang bad ka sorkar jong ka NPP.
Kitei ki jingkren jong ki ar tylli ki Block, kin buh jingeh khlem pep, ia kitei ki 3ngut ki MLA, namar ba ynda la poi ha kashari, kan mih ka jingiatai halor ka jingleit pyniasoh jongki lane kaba ki khot ka merger, kumba la kam da u lamphang dorbar jylla, ha ki khyndiat sngi ba ladep.
Ki kyndon jong ka Tenth Schedule, ki kren shai ba ka merger, ka dei ban long ar na ka lai bynta na ka jingdon jong ki dkhot jong kano kano ka seng bad ka mat, ka ban mih ha ka jingtohkit jong ka kashari, kan dei ia ki nongialam ha ki Block bad ki Unit bad lada kitei ki iai neh ha ka seng Congress, kumta kan buh ia ka jingeh kaba khraw ia ki 3ngut ha khmat ka jingbishar jong ka kashari, khamtam, kan da la poi ka jingbishar jongka Supreme Court.
Kin don ki ban pyn ia syriem ia kane ka jingjia bad ka jingleh jong ki 2ngut ki MLA ka PDF, hynrei kane ka iapher la ka jong ka jong, namar ka PDF, ka dei ka parti rit, ha kaba U MLA u dei hi U President bad u nongkitkam party, katba ka Congress, ka dei ka parti heh bad ba ki nongkitkam jongka, kim dei satia kijuh, kumba long ki MLA jong ka seng PDF bad ynda la ia tih bniah shaphang ka kyntien merger, hangta kan sa mih ka jyrwit jyrwat kaba jubor bha, namar ba kane ka jingleh jong ki 3ngut ki MLA, ka dei beit ka jingkyntiap seng(defection).
Ngin dang ia peit, ia ka sien jam kaba nyngkong jong ki nongialam Congress, pyrshah ia kitei ki 3ngut bad lada kin leit sha High Court, kumta kan sa nang iaid ka jingtian bishar, hynrei lada jia lei ba ki iohlad ban thep syndon ha Supreme Court, hangta kan long kaba jwat tiang, namar kan donkam ia ka jing pynkhreh ia ki kot ki sla, ki jing iadon bynta lang jong ki nongtrei parti na ki 3 tylli ki Constituency bad wat na ki District ba ki don bad lada kim don ia ki nongkyrshan kiba biang, kumta ka kashari kan lah ban shim rai haduh kaba weng noh ia ka jinglong dkhot jongki, katba kum ki kyndon jong ka ain kyntiap seng (disqualification), halor ka jingbthah jong ka riti synshar ri, kaba kren shai, ba ka jingleit iasoh bad kawei pat ka seng sain pyrthei, ka dei ban long 2 na ka 3 bynta (two thirds of the member of the party).
Haei ka Burom u paidbah ?