Ka pynkyndit kumba iuh tdong bsein, haba U bah Prestone Tynsong, symbud myntri rangbah ka jylla bad u nongialam ba heh duh ka seng NPP, ha ka jylla, ula kren sha ki kotkhubor, da kaba u ong, ba kane ka sorkar MDA kan pyndep, ia la ka jong ka por jongka, na ka bynta san snem pura lane ba kane ka kynhun synrop jong ka NPP, UDP, HSPDP, BJP bad kiwei kin iatreilang haduh kaba kut ka por.
Kane ka jingkren, ka la kylla pyrdet noh, na kaei kaba utei u nong ialam, ula ju kren ha ki bun bnai mynshwa, kaba sdang naduh ka elekshon MLA 2023 bad ka elekshon ha Sohiong, ha kaba u da kren kob, kumba u don ia ka bor ban weng noh ia ki MLA jong ka seng UDP, na kane ka sorkar synrop MDA bad ba u buh ha ki kyntien jongu, ba kitei ki dei ki nongshong ha tnum jong ka bos bad katei ka jingkren, ka la thad rong ia ka seng UDP, ha kaba ka la shah kynshi kyneh ha u paidlang ba bun ka Ri Khasi Jaintia bad kaba la pynsniewdur ia katei ka seng, ha ka elekshon MP 2024 bad kam dei tang kata, katei hi ka jingkren thadrong, ka la kylla tad dor ia ka seng NPP (kaba dei ka seng jong utei u nongkren) bad ka HSPDP, kaba don lang ha ka kynhun synrop.
Ha ka jingpyrkhat jong kiba bun, ki la nang shim, ba kat ka jingkren, jong u nongialam ba rangbah jong katei ka parti, ba ka dei ka jingkren kaba shai bad kaba shisha, hynrei mynta ka pynkyndit pynban, ba haba katei ka seng, ka la dap briew dalade hi ban pyniaid ia ka sorkar, hynrei, kam nud ban khalah ia ki 14ngut ki MLA jong ka UDP/HSPDP bad katei ka paw shai noh, ba ka jingkren pleng ka dei tang ka jingkren khyllung khynnah bad kam dei satia ka jingkren kaba iahap bad ka kyrdan jong ka jinglong nongialam bad kiba kum kine ki jingkren, ki sa ailad ia u luk u lak ba un sieh kylla, ha ban da biang artad.
Ka jing ijli sat jong u paidlang ka Ri Khasi Jaintia ia kane ka sorkar (khamtam ia ka seng NPP), kam dei satia, na kiwei pat ki daw, hynrei ka dei hi na ka jingkren khlem da thew jong ki nongialam jongka bad ia kata ngin hap ban pynshisha ba ki jingkren kiba shongshit eh ha ki rynsan elekshon bad ki social media, ki dei (i) pynbiej man ka san snem, ngop man ka san snem (ii) ka seng UDP, dei ka seng kaba shu sdien ha tnum bos.
Ngin dang ia peit ia kaei ka UDP kan shim rai halor kane ka bynta, hynrei mynta ka la paw shai, ba kito ki jingkren kobsob, kim dei satia ki jingkren jong U Conrad Sangma, uba dei u trai hok jong ka seng NPP, hynrei ki dei pleng tang ka jingkren jong ki nongbeh nong jongu bad hangne ka paw shai ruh, ba kiba sngewthuh ia ka jingiadei jong ka UDP bad ka NPP, ki dei tang na ka iing jong U Conrad Sangma, namar ba kitei ki la iadon lang ha ka sorkar synrop ha u snem 2008, ha kaba U Purno Sangma, ula shet noh ia ka UDP, tang hapoh shiphew bnai bad nangta, ki ia treilang biang ha u snem 2018 bad mynta u 2023.
Ka jingshisha ka long, ba u paidlang ka Ri Khasi Jaintia bad wat sha Garo hills, ki la isih jubor ia ki nongialam jong kane ka sorkar synrop MDA bad katei hi ka la pynlong ba kin shah pynrem kput ha ka elekshon MP, ba dang shu dep, ha Shillong bad ha Tura ruh bad kumta kam long kaba suk ban syrdep ia kaba la jot, wat lada phi thaw da kino kino ki lad, namar ba ka jing ijli ia kitei ki jingkren, mynta kim shong shuh tang ha ki rynsan elekshon, hynrei ki la ngam tylli tyllan ha ka jingmut jong u luk u lak.
Kane ka dei ka por, ba ngin sngewthuh ba ki nongialam, kim lah ban kren ialade kum ki khynnah surok, namar ba lada kam don shuh, ka jing pyn iapher, hapdeng kito kiba la bam smai ha ka riti synshar jong ka Ri India, ha por ba ki jop elekshon ne long myntri sorkar; kumta ka pyni noh ba ka jinglong nongmihkhmat ne ka jinglong myntri sorkar, ka iahap kyrdan lang pleng bad kito ki khynnah kynjat sla ha iew Mawlong.
excess majority Vrs shortage minority