Lada dei ba nga kwah, nga la leit naduh mynshwa sha ka NPP, ong u bah Ronnie

Shillong: U MLA ka Congress u bah Ronnie V Lyngdoh ula ong ba lada dei ba u kwah ban phet sha ka NPP, ula leit naduh kham mynshwa, namar ba ki la dep khroh ia u dain shi dain hynrei, um treh satia namar ba u ieng ha ka nongrim.

Haba kren sha ki lad pathai khubor mynta ka sngi, u bah Ronnie u la ong ba u don bad ka Congress bad un iai sah bad ka Congress, bad kampher lada u don marwei ruh namar ba ki nongtrei ka party bad ki nongialam ki don bun. Ka jingrah ia ki mat ki jura kam dei tang ba long MLA hynrei sha kiwei ki rynsan ruh ki lah ban rah.

“Lada dei ba nga kwah leit sha ka NPP, nga la leit naduh mynno, hynrei nga la rai ban neh beit ha ka Congress bad ngan iai neh”, la ong u bah Ronnie.
Lah ban kdew ba lai ngut ki MLA ka Congress kiba kynthup u bah Charles Marngar na Mawhati, bah Gabriel Wahlang na Nongstoin bad u Dr. Celestine Lyngdoh na Umsning kila krad noh sha ka NPP bad ieh marwei ia u bah Ronnie, uba dei ruh u nongialam liangpyrshah.