Kynnoh ka Bangladesh, ba leh bein ka India, da kaba pynshlei um

Dhaka:U nongai jingmut ha ka liang ka jingpyntip bad pynphriang khubor jong ka sorkar shipor ka Bangladesh, u Nahid Islam mynta ka sngi u la ong ba ka India ka la pyni ia ka jingleh niewbein jongka, da kaba plie ia ka dam khlem da pyntip lypa, kaba pynmih ia ka jingshlei um kaba jur bah ha Bangladesh.

U la kyntu ia ka ri ba marjan ba kan sangeh noh ia ka rukom treikam kaba pyrshah paidbah bad u la kyntu ruh ia ka India ban weng noh ia ki “jingeh” hapdeng ki ar tylli ki ri khnang ba yn lah ban tei biang ia ka jingiadei hapdeng ki ar ri “halor ka nongrim jong ka jinglong hok”.
Ia kane u Nahid u la ong ha ka jingiakren bad ki lad pathai khubor, hadien ba la wai ka jingialang jong ka jingai jingmut ha iing jngohkai kaba don ha Jamuna ha ka por janmiet.

U Nahid Islam, uba long ruh u nongïalam jong ki samla pule bad u nongïalam ba kongsan jong ka jingiakhih jong ki samla pule pyrshah ia ka jingshah lehbein, u la ong, “Ngi lah ban ïohi ïa ka um kaba sharum ka wah kaba wan rung bad wanrah ïa ka jinglong jingman jong ka jingshlei um. Ka India ka la pynpaw ïa ka jingleh niew bein bad ka jingbym ïatreilang da kaba plie ïa ki dam khlem kano kano ka ka jingmaham lypa.”
“Ngi kyntu, bad kyrmen ba ka India kan kiar na kane ka jait polisi pyrshah ia ki paidbah ka Bangladesh shen. Ngi dei ban wad ia ka lad kumno ban iada lang ia ki paidbah ka Bangladesh bad ka India na kane ka jait jinglyngshop ka mariang,” u la bynrap.

U Nahid Islam u la ong ruh, “Ki samla pule bad ki paidbah ka Bangladesh ki bitar ïa kane ka polisi jong ka India.”
Ki paidbah ka Bangladesh ki la ialeh ban ioh ia ka bhah kaba biang jong ki na ka bynta ka um la slem bah, u la bynrap.
Kham mynshwa ha kane ka sngi, ka tnad bar ri jong ka ri India ka la pynmih ia ka kyrwoh kaba pynrem ia ki jingkynnoh ba ka jingshlei um ka dei na ka dam Dumbur.

“Ngi la iohi ia ki jingsngewkhia ba la pynpaw ha Bangladesh ba ka jinglong jingman mynta jong ka jingshlei um ha ki distrik ha ki khappud mihngi jong ka Bangladesh ka dei namar ka jingplie ia ka dam Dumbur sharum jong ka wah Gumti ha Tripura. Kane ha ka jingshisha kam long kaba thikna” ka jingpynbna mynta ka sngi.
Ka MEA ka India ka la ong ba ki kwah ban pynpaw ba ki jaka lum um jong ka wah Gumti kaba tuid lyngba ka India bad Bangladesh ki la sakhi ïa u slap uba jur tam ha une u snem ha kine ki khyndiat sngi ba la dep. Ka jingshlei um ha Bangladesh ka dei nyngkong eh namar ki um kiba mih na kine ki jaka lum um kiba heh kiba don shapoh jong ka dam.