Ka seng NPP, ka dang shu jop elekshon MLA ha u snem 2023 bad mar ia jop, ka la ioh ia ka jing iatrei lang jong ka seng HSPDP, UDP, BJP lem bad ki dkhot marwei.
Koit kam lei lei ia kata, namar ba ka jingiatreilang ha iing dorbar, ka ju don hi ha ki khep ki khep bad katei ka la ju jia ha kane ka jylla bad ha kylleng ka India ruh; hynrei kaba pyn pyrkhat hangne, ka long ba mar ia jop elekshon, ki 2ngut ki MLA jong ka seng PDF, ki la pynduh noh ia ka seng jongki bad ki iasoh sha ka seng NPP bad mynta dang shisnem tam, sa lai ngut ki MLA jong ka seng Congress, ki la kyntait noh ia ka seng lajong bad ki pyniasoh sha ka NPP bad kata ruh kaba dei ka seng kaba heh bun spah shah ia ka NPP bad kaba don haduh 100ngut ki MP ha Lok Sabha.
Ka wan ka jingkylli hangne, ba haba ki MLA Congress, ki don 4ngut ha Khasi hills, hynrei ki kwah ban leit sha ka NPP, katba U Saleng Sangma, uba don marwei, ula dei ban kynthih stet shwa ma u, naduh mar ia jop elekshon ha u snem 2023 (bad wat lada dei ban ialeh elekshon biang ruh kam pher), hynrei u ieng marwei bad ha ka elekshon MP u pyndem toin ia ka NPP ha Garo hills.
Ym dei tang katta, don sa U Mukul Sangma, uba lah ban pynduh ia ka TMC tang ha ka shi khyllipmat, namar ba ki saw ngut ki MLA ha Garo hills, ki dei ki iing ki sem jongu hi; hynrei utei ruh, um shym la shon satia ka jingmut jongu, ban leit rung NPP noh, ba la shah rem kput ha ka elekshon 2023.
Hynrei haba peit pat ha Khasi hills, ngi iohi, ba wat tang da ki bnai ruh, kim lah shah bad ki la shu noh iap ialade, khlem da pyrkhat ia ka nongrim lajong, khlem da pyrkhat ia ka burom ka ijot ki nongkyrshan lajong bad khlem da pyrkhat, ia kaei ka jingmyntoi ba kin ioh na katei ka jingleit rung party thymmai bad ki jingshisha hi ki kren, ba ki arngut ki MLA barim ka PDF, ki shu long kum ki riew paidbah, namar ba kim ioh bhah eiei satia bad wat ban kren pat ha iing dorbar ruh, ki hap ban shu iaroh beit ia ka sorkar MDA.
Kine ki riew kyntiap seng, ki ong ba haba don ha ka sorkar, ki lah ban leh ia ki kam pynroi bad ba kin sa ioh ia ki jingshaniah jong u paidbah bad halor kane ngi dei ban shim na ki jingkhein kiba biang bha, kiba iadei ha ka result MP ba dang shu dep bad kitei ki kynthup ia ka Nartiang Constituency, kaba don u number ar jong kane ka sorkar bad ha ka jingkhein, ka pyni ba ka kyrtong NPP, ka shah rem, da 9hajar vote ha u kyrtong ka VPP; wan sa ha Khliehriat, ha kaba u don u myntri sorkar jong ka UDP bad hangne, u kyrtong katei ka seng, u wan balai; wan sa ha Pynursla, ha kaba u don u number ar jong ka NPP, hangne ruh u shah tam da 10 hajar vote bad nangta sa ha Mairang, ha kaba u don u heh duh ka seng synrop MDA, hynrei u shah tam, da 8hajar vote ha u MP jong ka seng VPP bad katei ka jubab ka la shai bha, ba kitei ki Constituency khleh khoh, ki la kyntait ia ki MLA lajong, namar ba kim iohi ia ka roi ka par lane ba ki la jlep palat liam ia la ki jong ki MLA, ba ki dang shu dep jied dang shisnem mynshwa.
Haba iakren ia kane ka sobjek, ngi donkam ruh ban peit ia ka jingioh vote jong ki 5ngut ki MLA, ha ka elekshon MP, ba dang shu dep bad kitei ki kynthup ia ka Mawhati, ha kaba U Bah Charles, u pynioh tang 7 hajar ia ka Congress bad u shah tam 9 hajar ha ka VPP, ha Umsning, u Dr Celestine, u ioh tang 9hajar vote bad u shah tam haduh 7hajar vote, ha Nongstoin U bah Gabriel, u ioh tang 6 hajar vote bad u shah rem da 14hajar vote ha ka VPP, ha Sohra U bah Gavin, u ioh 2hajar vote tam bad u shah rem da 14 hajar, ha Mawkynrew, U bah Banteidor, u ioh 1600 vote bad shah pynliem haduh 20hajar vote.
Ka jingkylli hangne, ka wan, la kitei ki 3ngut kiba iasoh NPP, ki la shim na katei ka jingkhein jong ka MP bad ki sngew thikna, ba kin dei tang ki MLA shisien bad kumta ki noh iap, tang ban ioh shong shuki mata madei lane lada kam dei kumta, la ka dei ka buit jong ka NPP, ban pyndap briew jubor ialade, na bynta kine ki por, kiba dang sah sa 3 snem tam eiei?
Ka jingshisha kan sa nang paw, hynrei ka NPP, ka la dei ban kyndit bynriew, namar ba ka la iohi shynna, ba kine ki masi phet sem, kim ai jingmyntoi eiei ruh em, namar ba ha ka elekshon MLA ba ladep, ka la thied rem ia ki phew ngut ki MLA na ka seng Congress bad na kiwei ki parti, hynrei kitei ki shu rem tang ka dor, katba ha ka elekshon ki shah rem kput pynban.
Phi don ban ong eiei?