Ngi khlem pat pyndem iaka management board haduh mynta,jingkynnoh u bah PS. Lyngdoh ka bakla:Acting Syiem

Shillong 21 Nailar: U acting Syiem ka Hima Langrin u bah B. Syiemiong u la wan shakhmat ban pynshai ha ka ba iadei bad ka jingkynnoh ka seng samla ka hima langrin ba la ialam khmat da u bah Ps. Lyngdoh, da ka ba kynnoh ba ki la pyndem tdong hapoh ka management board jong ka Lawlangamtila bad pyndentangli Hima Langrin.

Ki seng samla Hima Langrin ki la kynnoh, ba ki dkhot ka Executive komite ka Hima Langrin ha ka jingialam u acting Syiem u bah B. Lyngdoh ba ki la iasuk noh ban pyndem tdong hakhmat ka management board tang ban ioh sei ia ka pisa ka ba kot haduh 2,15,00,000 tyngka.

Kumta u bah B. Lyngdoh ba dei u acting Syiem ka Hima Langrin u la pynshai ba haduh mynta kim shem la pat pyndem ia ka management board bad ki dang ialeh haduh mynta bad ka jingkynnoh u bah PS. Lyngdoh ka long ka ba bakla.

Halor ka jingkynnoh ba u bah B. Syiemiong acting Syiem u la leit ban pyndem sop sop ha khmat ka management board ban ioh sei noh ia ka pisa baroh ka ba kot haduh 4,30,00,000 tyngka bad ia sam hapdeng ar kynhun ,ba la ioh da ka ba ker sainar shiah, hynrei na ka liang u Acting Syiem u la pynshai ba ia ka pisa ba la dep ban sei kata 2,15,00000 tyngka la sei da ka jingiatiplang baroh ki dkhot ka executive dorbar ym ba u sei tang marwei.

U bah B. Syiemiong u la pynpaw ruh, ba ngim shem la pat pyndem tdong ha ka management board hynrei ka Hima Langrin ka la sdang ia ka nongrim ba kan iai ialeh ia kane ka jingkam ri kynti jong ki briew tad haduh ban da ioh ia la jingbishar ka ba hok da ka ba nga ieng ha ka liang u paidbah ban ialeh ban nym ai ia ka khyndew sha ki briew ki ba kam ri kynti ka ba dei ka iing jong u Syiem ba la shah sospon u bah Nangtei Syiemiong.

Shuh shuh u la kyntu ia baroh ki paidbah ka Hima Langrin ki ba la iohi ia kato ka khubor ba kin sngewbha ban pynbeit ba ka jingkynnoh u bah Ps. Lyngdoh baroh ka long ka ba bakla namar u bah Ps. Lyngdoh ruh um shem ioh ia ka sakhi ba ka Hima ka leh sop sop tang ban ioh sei ia ka pisa.

Lada ki don shisha ka sakhi, ba ka Hima Langrin ba la ialam da u acting Syiem u bah B. Syiemiong ki la leit pyndem tdong ha ka management board ban sei sop sop ia ka pisa iakata ngim sngeweiei namar kadei ka jingshisha hynrei ki shu kynnoh khlem nongrim bad khlem da tip ia ka jinghisha, la bynrap u bah B. Syiemiong.