“Dei da ka jingsoi kyrteng ba shu thok” ba khie ka thma hapdeng ka Saudi Arabia bad ka Yemen

Phi ju mutdur ne em, ba kat ia ka thma, kaba la pyniap ia 3lak ngut tam ki riew paidbah, ba kan dei pynban, kaba la ai rai, da kaba shu soi thok, ia ka kyrteng jong u khlieh duh jong ka ri bad katei ka dei ia u khun Syiem, Mohammed Bin Salman, uba la shu soi thok, ia ka jingsoi kyrteng jong u kpa jongu, ban pynmih hukum ba ka Saudi Arabia, kan hiar thma pyrshah ia ka Yemen.

Ka dei ha u snem 2015, ha kaba katei ka ri, ka leit hiar thma pyrshah ia ka Yemen bad kaba la shim ruh, ba ka dei ka thma ban ia pyni bor hapdeng ka Saudi Arabia pyrshah ia ka Iran.
U nongai jingmut ia ka sorkar jong ka Saudi Arabia, u iathuh ba U Mohammed bin Salman (MBS), ula shu soi thok ban ai ia ka hukum, ba ki shipai kin leit hiar thma ia ka Yemen. U Muhammad bin Nayef (MBN), u dei tang u nongioh pateng ia ka khet ha ki snem 2015 haduh 2017, ha shwa ba u syiem Salman, un thung ia u, ba un shimti ia ka jingsynshar ba pura, la iathuh da u Saad Al-Jabri, uba dei u nongai jingmut jong u MBS, ha kitei ki snem.

Ha ka jingkrens ha ka BBC, u Saad Al-Jabri, u iathuh ba katei ka thma, ka dei ha u snem 2015 bad hadien kata, ka poi sha ka jingleit hiar ki shipai ialeh ha ryngkew, hynrei ynda la ioh jingtip, la iathuh ba ia katei ka hukum, la soi pynban da u MBS bad kam dei satia, kaba la soi da U Syiem Salman. “Ngi ioh jingtip, na kito kiba don ha katei ka tnat, ba katei ka dei ka jing shu soi thok jong U MBS, ia ka jingsoi jong u kpa jongu, ban ai ia ka hukum, na ka bynta ba kin hiar thma ki shipai ha ryngkew”. U Al-Jabri mynta u don ha ka jingphet rieh ialade bad u shong u sah ha Canada, hadien ba u phet noh na Saudi Arabia, ha u snem 2017.

Ka UN ka ai jingkhein ia ka jingiap jong ki 377,000 ki riew paidbah, ha katei ka thma, ha kaba ki don da sa 4 million ngut kiba la iehnoh ia la ki iing ki sem jongki.