Ka longkmie kaba ieng marwei, ban seng skul ha khappud India Bangla

Shillong:Ka Kong Manahun Sohkhlet kaba dei ka kynthei ba nyngkong hapoh Riwar Mihngi Pynursla ban seng ia ka skul ban ai jinghikai ia ki khynnah kumno ban nang ban kren phareng. Ka Kong Mana napoh Nongtyngur kaba shong ba sah ha Mawsyntiew, kaba don ha marpud ka India bad ka Bangladesh.

Ka kong Mana ka la shim da kane ka sienjam ban seng da kane ka skul kaba la tip kum ka Angels English Medium school Lyngkhat kaba don hi hapoh ka shnong Lyngkhat, namar kala iohi ia ka jingdawa kat nang iaid ki sngi ki por ki heprit ki donkam ban nang ban kren English ha kum kane lei lei ka juk ba mynta.

Ka kong Mana ka la long ka Longkmie kaba hap ban bah ia ka lyngkor kum ka kmie ban pynnang pynstad ia la ki khun kiba don 5 ngut bad ka dei ha u snem ba ka jing khangdam ha u snem 2021, ba ka la seng ia kane ka skul bad ka la sdang khyndiat khyndiat naduh i class nursery ter ter kat nang kiew kitei ki khynnah bad ka jingai jingshakri ka nang khlaiñ bad halor ka jing nang bna nam jong katei ka skul phareng ka la pynlong ba ki khynnah na kiwei kiwei ki shnong ki la wan hiar sha Lyngkhat ban buh skul ia ki khynnah bad dei haduh u ne u snem 2024 ka la kiew shaduh ka class 5.

Nalor ka Headmistress, ki don sa arngut ki nonghikai, kiba wan ban ai ka jingiatrei lang, uwei u Samla Jewellstar Khonglam bad ka samla Bymercy Lyngdoh bad kitei baroh ar ngut ruh kiba dei na Nongtyngur.
Kaba sngewsih, ka long ba ia katei ka skul, la ban noh ka diengjri, ha kaba ka tnum, ka la pra namar ka jingban ka diengjri bad mynta la shu pynlong noh ia katei ka skul ha iing sah jong ki briew, kaba don ha syndah jong iing jong ka Raid Lyngkhat.

Na ka liang jong katei ka longkmie, kaba pyniaid ia katei ka skul, ka khot ia ki bor sorkar bapher, lada dei ia ki BSF, ia U MLA jong ka thain, ba kin phai khmat, na ka bynta ban iarap ia katei ka skul, wat la ka dei kaba pyniaid da ki riew shimet ruh.