Ka BJP ka thep kol penalty ia ka NPP ha ka MP na Tura, ong u Rakkam

Shillong: U nongialam ka NPP u Rakkam A Sangma ula pynpaw ia ka jingsngew kyndit ban iohi ba u nongialam ka BJP ula phla ba ka BJP ka kyrshan ia u kyrtong ka Congress ha ka MP elekshon na Tura.

U Rakkam u la ong ba ha ka jingshisha, ka NPP ka la ngeit bad pyrkhat ba ka BJP kan kyrshan ia ka kyrtong ka NPP ka Agatha A Sangma, hynrei ka jingshisha ka la paw shynna mynta ba ka la kyrshan pynban ia u kyrtong ka Congress u Saleng A Sangma bad kane ka la long kumba ki thep penalty ia ka NPP.
“Ngi nang pyrkhat ba ka BJP kan kyrshan ia ngi na Tura ha ka MP elekshon ba la dep, hynrei ka jingkren u nongialam ba hakhmat ka BJP na Garo Hills u Bernard R Marak, ka paw shai ka jingshisha. Kila thep kol penalty ia ngi”, la ong u Rakkam.

Lah ban kdew ba u nongialam ka BJP, uba dei ruh u MDC ka Garo Hills Autonomous District Council u Bernard R Marak u la kren dang shen ba ka BJP ka kyrshan ia ka Congress ha kane ka MP elekshon kaba dang shu dep shen.
U Saleng ula pynliem jem ia ka kyrtong ka NPP ka Agatha K Sangma palat shi lak vote tam, kaba la jop ar sien kum ka MP ka Tura.
U Rakkam u la ong ba nangne shakhmat ka NPP kan ym iateh paralok shuh bad ka BJP haba iakhun ia ka elekshon kumba la mad ha kane ka elekshon MP kaba la dep.