Weng noh ia ki nongtrei District Council ha Lailad, thung noh da kiwei, dawa ki nong Umladoh na ka KHADC

Nongpoh, 12 Nailar: Ka jingialang hapdeng ki paidbah na ka shnong Umladoh lem bad ki briew ka District Council, kaba la donlang ruh da baroh ki heh ka tnat ki kam khlaw jong ka District Council, kam shym la poi sha kaba iahunlang, ha kaba ki paidbah, ki la kynnoh ba kim shym la ioh ia ka hok ba kren, namar ki briew ka District Council kim shym la ailad ia ki ban kren bad kiba la shu pynkut jubor ia ka jingialang, khlem da ka jingia mynjurlang da ki paidbah.

Ka jingshisha halor katei ka jingkynnoh da kitei ki paidbah, la sakhi hadien ba la wai ka jingialang, ha kaba ki heh ka District Council, kaba kynthup naduh ka EM, u MDC lem bad kiwei ki ophisar ka District Council, tang mar ia kut katei ka jingialang, ki la leit ban bamja noh sha IB ka District Council kaba don ha Lailad, hynrei ki paidbah pat ki la ap beit triang ha surok, kata tang ban ioh kren sha ki lad pathaikhubor bad ba kin ioh ban pynsngew bad ban pynshai sha ki paidbah halor ka jingsngew kaba ki don.

Haba ki lad pathaikhubor ki la poi ha katei ka jaka, kitei ki riew paidbah, ki la pynpaw da kaba ong “ Ngim hun halor ka jingialang bad kitei ki briew ka District Council, namar ngi khlem iohlad ban pynpaw ia ki jingsngew bad ruh ba ki khlem ailad ia ki paidbah ba kin pynsngew iala ka jong ka jingsngew kaba ki don ban pynpaw”.

Nalorkata, kitei ki paidbah ki la pynmih ruh ia ka jingdawa na ka Khasi Hills Autonomous District Council (KHADC), ba ki dei ban wengnoh syndon ia baroh ki nongtrei ka District Council kiba don ha Lailad Beat, da kaba kynnoh ba ki dei ki briew kiba iasngewthuh jingmut bad ki briew hapoh katei ka shnong, hynrei ha ka jaka jong kitei ki briew kiba don mynta, la dei ban wanrah noh da kiwei kiba iasngewthuh jingmut bad ki paidbah.

Ka nongrim kaba la pynlong ia kitei ki paidbah ba ki pynmih syndon ia katei ka jingdawa ban weng noh ia kitei ki nongtrei District Council kiba don mynta ha Lailad Beat, ka dei hadien ba ki lap ba ki dei ki briew kiba lehheh bad ki bym don kata ka jingiatreilang bad ki paidbah ha shnong Umladoh.