Kular ka EM ban iakren ha ka EC, na bynta ban siew ia ka bai lutksan halor ka jingjia ha Umladoh

Nongpoh, 12 Nailar: Ka Kong Macdalyne S. Mawlong, MDC bad kaba dei ruh ka EM kaba dei peit ia ka tnat ki kam khlaw ha District Council, mynta ka sngi ka la hiar sha ka shnong Umladoh, na bynta ban iakren sngewthuh bad ki briew hapoh katei ka shnong, hadien ba la don ki briew na katei ka shnong, kiba la shah pom pynjulor ia ki jingthung jingtep ha ki briew ka tnat khlaw ka KHADC bad kaba dang shu jia ha kine ki khyndiat sngi ba la dep.

Ha katei ka sngi, ba ka Kong Macdalyne S. Mawlong, ka la hiar sha katei ka shnong, la synranlang ruh da u Bah Balajied Ranee, MDC Nongpoh, nangta u Bah Kampher Kharsati, CFO ka District Council, ki heh ka tnat khlaw na District Council lem bad kiwei.

Ha ka jingialang hapdeng ki briew ka District Council lem bad ki briew na katei ka shnong, ka jingiakren hi ka dei beit halor ban dawa na ka District Council ba ka dei ban siew beit ia ka jingduhnong ki nongrep, kiba la shah pom punjulor ia ki jingthung jingtep jong ki.

Ka jingialang kam da dei eh kaba slem, namar na ka liang ka EM jong ka tnat ki kam khlaw ka District Council, ka la ai ia kata ka jingkular ba halor katei ka mat, kan sa rah bad ban pyntip sha u CEM ne ban pynlong da ka jingialang ka Executive Committee jong ka District Council bad hangta yn lah ban rai ba katno kin sa siew sha kito ki nongrep kiba la shah pynjulor ia ki jingthung jingtep.

Katei ka jaka, ba ki nongrep ki la shah pom ia ki jingthung jingtep ha ki briew ka District Council, ka dei shisha ka jaka jong ka District Council, hynrei kaba la pynioh daw ia ki briew na katei ka shnong, ka dei hadien ba ki briew ka tnat khlaw jong ka District Council, ki la leit ban pom naphang ia ki jingthung jingtep, ha kaba ki la leh ia katei ka kam khlem da pyntip bha ne aipor ia kitei ki nongrep ba kin rah noh sha kawei ka jaka, ia kitei ki jingthung jingtep, hynrei ban shu leit ban pom naphang, ka dei kaba pynsngewsih eh ia ki nongrep bad kiba la pynlong ia ki ba kin dawa na ka District Council ba ka dei ban siew ia ka bai lutksan.

Ka Kong Macdalyne S. Mawlong, haba kren sha ki lad pathaikhubor, ka la kyntu ia ki paid nongshong shnong, ba lada ki donkam ka rep ban riang hapoh ka khlaw forest jong ka District Council, ba ki dei ban kynduh sha ki bor ka District Council, khnang ban lait na kino kino ki huri hura hapdeng ki briew ka tnat District Council lem bad ki paidbah nongshong shnong.