Shillong: Ka tnad pla tyngka jong ka sorkar India ka la mynjur ia ka pisa 2,000 klur tyngka na ka bynta ban pynroi ia ki surok bad ki lad pynpoi marbam hapoh ka Second Phase jong ka Meghalaya Integrated Transport Project (MITP), kaba la tip thikna kum ka Meghalaya Economic Growth Accelerator (MEGA) Corridor projek.
Ka jingpynjari thymmai ka dei ka jingmih na ka jingpyntreikam kaba jop ia ka bynta ba Nyngkong jong ka MITP. U Myntri Rangbah ka Jylla U Conrad K Sangma, ha ka jingiakynduh bad ka myntri pla tyngka jong ka sorkar pdeng, ka Nirmala Sitharaman ha ka 24 tarik jylliew 2024, u la leit rah ïa ka mang, na ka bynta kane ka projek bad u la pan ruh ka jingkyrshan pisa shuh shuh. Ka Sorkar Jylla ka ai khublei ïa ka tnad kaba la pyrkhat bha ïa ka jingkyrpad jong u Myntri Rangbah bad ai ïa ka pisa.
Ia ka bynta kaba nyngkong jong ka MITP la pyntreikam da ka jingkyrshan kaba 880 klur tyngka na ka World Bank. Hapoh kane ka projek la pyntreikam ia ki katto katne ki surok ba kongsan kum ka Baejendoba-Resubelpara-Mendipathar-Damra, Shillong–Diengpasoh bad Pasyih–Garampani. Ka jingpyntreikam kaba jop ia kane ka projek la ai ka jingiaroh na baroh ar tylli ki World Bank bad ka tnad pla tyngka.
Hapoh ka projek Second Phase jong ka MITP (MEGA Corridor) yn pyntrei palat 300 Km ki surok kiba lah ban shah ia ka jinglong ka suinbneng kiba pyniasoh ia ki jaka roi kiba kongsan kum ka Shillong, Tura, Jowai bad Dawki. Yn pynleit jingmut kyrpang ha ki surok sor kiba pyniasoh ia ka New Shillong Administrative City bad ka New Shillong Knowledge City, da kaba pynkylla ia ka nongbah Shillong kum ka jaka roi ka thain. Nalor kata, yn pynroi ia ki jingdonkam bapher bapher kum, ki jaka karkhana, ki ïing buh mar, ki jaka pynmih mar rep bad ki iew ki hat. Lada khein lang ia kine ki jingdon jingem la thmu ban pynsted ia ka roi ka par bad ka jingrung kham jylliew jong ki kam kamai sha ki jaka ba jngai, da kaba pynroi ia ka jingpyniasoh surok kaba pura bad kaba khlem jingeh ha baroh kawei ka Jylla.
Kine ki jingïarap hapoh ka projek MEGA Corridor, ryngkat bad ki projek kiba dang ïaid shakhmat kum ka surok Shillong Dawki (NH 106 & 206), ka surok Tura Dalu (NH 217), ka surok Phulbari sha Goeragre (NH 127B), ka jingkieng Dhubro-Phulbari kan plie ïa ki lad ki lynti jong ka Jylla ha kaba pynkylla sha ka jaka pdeng jong ki mar ki mata bad ka jaka ba khlain bor ha ka ioh ka kot jong ka thain, da kaba pyrkhat ia ka ioh ka kot kaba kot sha ka USD 10 Billion ha u snem 2028.
Ha ka kyrwoh, kaba la pynmih da U Commissioner and Secretary Planning, Investment Promotion & Sustainable Development Department, jong ka sorkar jylla, ym shym la thoh satia ia ka pisa kaba la mang na kano kano ka pla, hynrei ha ka account jong U Conrad Sangma, myntri rangbah, ula thoh ha ka X, da kaba ong “Sngewnguh ia ka myntri pla pisa ka sorkar India, ka Sitharamanji, kaba la mang T.2000klur, na ka bynta ban pyntrei ia ka MiTP Phase II project bad ka World Bank. Mynta ngin iaid shakhmat, na ka bynta ban pyntrei ia ki surok kiba kongsan bad ban iai bteng ia ka kam ba bha, ba la leh da ka MiTP Phasi I”.
Ka meghalaya kan sa kylla long tag ka jaka Jong ka world bank lane ka jaka Jong ki nong ai ram namar ba ka sorkar u modi kam lah siew suh iaka ram