Shillong:Ki nongshong shnong ka Pyrdiwah hapoh khappud India- Bangladesh ki la pynpaw ba haduh mynta kim don kano kano ka jingsyier na ka jingwan rung beaiñ ki nong Bangladesh, namar na sha shiliang u pud ruh ki don ki khasi kiba ia ithuh ithaw bha.
U Rangbah Shnong ka Pyrdiwah, u Bah Ambrose Khonglah u la ong ba ka shnong ka kloi ban ai jaka rieh ia ki Khasi-Pnar kiba dei na Bangladesh lada ki donkam jingïarap lane don kano kano ka jingjia.
Hadien ba la mih ka jingiakynad kaba jur ha ri Bangladesh ka Sorkar India ka la pynkhlaiñ ia ki bor pahara ha ki khappud bad ka Bangladesh lyngba ka Border Security Force (BSF) bad shipai, hynrei kumba ka long haduh mynta kam shym don kano kano ka jingma na ka jingrung beaiñ ki briew na Bangladesh.
U Bah Khonglah u la ong ba kam don kano kano ka jingsyier ia ki nongshong shnong, hynrei na ka liang ka shnong ruh ka long kaba la pynkhreh ban iada, da kaba peitngor lyngba ki Village Defence Party (VDP).
Shuh shuh u la ong ba na ka liang ka shnong ka kloi ban iatrei lang bad ka Border Security Force (BSF) lada don kano kano kaba lah ban wanrah jingma ha kitei ki thain.
Haba kren bad kawei ka longkmie ka la ong ba ia mynta kam don kano kano ka jingsyier kum ki nongshong shnong, hynrei ha ka por mynmiet ki don ka jingsheptieng ioh ba ki wan rung ki nong Bangladesh ban tuh ia ki mar ki mata bad ki jingdon jingem.
Haba leit jngoh ia ki katto katne ki jaka ha khappud ryngkat bad u MLA ka BJP na South Shillong u Bah Sanbor Shullai, la lap ba ki nongshong shnong ki don hapdeng ka jingshngaiñ bad trei ia ki kam kumba ju long, la iohi ruh ba ki paidbah ki don ka jingiadei kaba bha bad ki (BSF) ha katei ka thaiñ khappud, bad kumjuh la sakhi ba ki khynnah ki ialehkai lehkmen sngewbha ha la ka shnong da ka jingkmen.
Lada trei hok ki BSF te shngain namar ki central force ki biang naduh ki tiar iada haduh ki riam ki beit bad kiwei kiwei pat ki jingdonkam ban leh patrolling.