Shillong: U myntri ka tnad jngohkai ka jylla u bah Paul Lyngdoh ula ong ba ka krem pubon Mawjymbuin ha Mawsynram ka dei ka jaka jngohkai kaba pawnam bha bad kan long kaba bakla shibun ia ka kum ka jaka mane jong kano kano ka niam.
Haba kren mynta ka sngi sha ki lad pathai khubor, u bah Paul u la ong ba kan ktah shibun ia kiwei lada pynkylla ia katei ka jaka kum ka jaka mane blei bad ka India kum ka ri bym shah niam, ym lah ban pynrung kum kane ka jingmut ban pyllong jaka mane ia katei ka jaka.
Haba kyrshan ia ka rai ka dorbar shnong Mawsynram ban pyrshah ia ka jingthmu pyllong jaka mane ha katei ka krem, u bah Paul u la ong ba u kyrshan ia ka rai ka dorbar shnong Mawsynram halor kane ka bynta.
U la iathuh ba haduh mynta khlem pat ioh jingthoh eiei na ka dorbar shnong ba kan pan ia ka jingtuklar ka sorkar jylla halor kane.
U MLA ka Mawsynram u bah Ollan Sing Suin ruh ula kyrshan ia ka rai ka dorbar shnong Mawsynram ban ym shah ban pyllong jaka mane ia ka krem mawjymbuin.
Mynta ka sngi sa ka NPP ruh ka kyrshan ia ka rai ka dorbar shnong Mawsynram, ban ym shah da lei lei ban pynlong ia ka krem mawjymbuin kum ka jaka mane blei jongno jongno.
Haba kren mynta ka sngi, u nongaiktien ka NPP uba dei ruh u MLA barim ka Mawsynram, u bah Himalaya M Shangpliang haba kyrshan ia ka rai ka dorbar shnong, u la ong ba kane ka krem ka dei kawei kaba pawnam bha ha kaba ki nongwankai kila wan ban peit bad jngohkai.
U la ong ba ka sorkar ka la bei bun bha ban pynbha ban pynitynnad shuh ia katei ka jaka jngohkai bad dang shen, ka tnad jngohkai ka la mang pisa bun lak ban pynitynnad ia kane ka krem. U la ong bai a kano kano ka jaka jngohkai pyrthei, ym dei ban ailad ban pyllong kum ka jaka mane blei jongno jongno.
Ula ong ba ka thain Mawsynram ka don ar tylli ki krem, kawei ka krem mawjymbuin bad kawei pat ka krem puri bad kine ki dei kiba la kyrkhu u blei.
ka krem Mawjymbuin ha Mawsynrram kadei ka krem ba la ai sngewbha lyngba ka mariang da u Trai Nongbuh Nongthaw kum ka dak jong ka jinglongdoh longsnam ka Hima Mawsynram na ka bynta ka Roi ka par ka khia ka shon u duk u suk jong ka Hima baroh kawei bad kada don da kita ki Basa ne Ki Thaw longblei ban da ban ker ia ka Hima na ka sniew ka smeh ,na ka pang ka shitom bad na ka jingwan hiar thma da ki nongshun bad haduh mynta ka ieng kumtei namar kadei ka jaka ba kyntang jong ka Hima
Ymbit daleilei ruh ban ai lad ia kane ka jaka ba kyntang ban pynlong jaka mane blei jongno re jongno
kadei ka jaka ba la kyrkhu da u Blei
Horkit hordang ym dei ban pynkhein ia ka Ain ba buh da u Blei ioh ka kyrtoh kylla shala Rympei
Nga kum u Riewshemphang nga kyrshan Triang ia ka Rai ka Dorbar Shnong Mawsynram bad kumjuh ruh ia kiwei pat ki Riew shemphang jong ka Thain Mawsynram