Ym lah pynshisha ia ka khubor ba 3 ngut ki MLA Congress kin rung NPP, ong u bah PN Syiem

Shillong: U Working president ka Meghalaya Pradesh Congress Committee (MPCC), u Bah Pynshngaiñ N Syiem u la ong ba haduh mynta ym pat lah ban pynshisha ia ka jingmih khubor ba don 3 ngut ki MLA ka Congress kiba thmu ban rung noh sha ka NPP.

U la ong ba ka party kan sa iasyllok bad ki MLA, namar haduh mynta la shu iohi tang ha ki katto katne ki lad pathai khubor. U la ong ba hadien ba la mih ka khubor bad khlem don ka jingpynshai lehse ka kdew ba kam dei kaba shisha bad ka bym sngewdonkam ban pynshai.
Halor ka jingkynnoh ba ka jingthmu mih ki MLA kadei namar ka jingiajan jong u president ka MPCC, u Bah Vincent H Pala bad ki nongialam ka NPP, u Bah Pynshngaiñ u la ong, ban iajan paralok badno badno kan ktah ia ka party kata ka bym lah ban long, namar ha ki kam synshar khadar ka Congress ka don ia la kajong ka nongrim.

Dang shen, ka la mih ka khubor ba ki don ki MLA ka Congress kiba la thmu ban leit iasoh sha ka NPP, kaba ialam ia ka sorkar MDA-2. Ka Congress ka don 4 ngut ki MLA ha ka ïing dorbar kaba don 60 ngut. Ha ka jingshisha ka don 5 ngut ki MLA hynrei ka la duna noh hadien ba u Saleng A Sangma ula risain hadien ba ula jop kum u MP ka Tura.
Kiwei ki MLA ka Congress ki long u bah Ronnie V Lyngdoh uba long ruh u Nongialam Liangpyrshah, Dr. Celestine Lyngdoh, u bah Gabriel Wahlang bad u bah Charles Marngar.