Kiba pyntrei ia kiba hapoh 14 snem, kin shah shong phatok

Shillong, 2 Jylliew:
U Deputy Labour Commissioner uba dei ruh u secretary ka Task Force on Child Labour, ka East Khasi u la pynban iar ba kino kino kiba pyntreikam ia ki khynnah ba hapoh 14 snem, ka jingpynshitom ia ki, kan long ban hap shong phatok lai bnai haduh shi snem kynthih.
Ka thymmei khubor na ka sorkar, ka la ong ba ka sorkar ka pyntreikam da ka Child Labour (prohibition and regulation) Act 1986 ka khang pyrshah ia ka jingpyntreikam da ki khynnah ba hapoh 14 snem ka rta ha ki katto katne ki jait kam, kum ka jaka shoh doh, ot doh, katkhana shna kali ne maramot kali, ki krem tih marpoh khyndew, shong shakri ha iing ha sem, jingtrei ha ki dukan sha, diary, restaurant bad iing basa, jaka sah pynngad, karkhana shna sabon, jaka shan snieh, ki kam misteri trei iing, karkhana shna grill, bad kiwei kiwei. La khang ruh ban phah trei ha kaba shna khiew, thang mawshun, shan tala, shna coke ne u dewiong, ki kam ha ka rep ka riang, karkhana ot dieng, shoh mawria, shna tyre, shna khiew, ban um ban khar tin jot bad kiwei kiwei, shna jingbam, bad kumta ter ter kumba la mana ha ka kyndon jong ka Child Labour (Prohibition and Regulation) Act 1986 bad ka buh ryntih ia ki adong ha ki katto katne tylli kiwei pat ki jait jingtrei.
“lada don mano mano ba pyntrei ne shah ba ki khynnah kin trei da kaba pynkhein ia kane ka ain kin shah pynshitom da kaba hap shong phatok lai bnai haduh shi snem bad ka jingshah dain kuna kaba ym duna ia ka shiphew hajar tyngka haduh arphew hajar tyngka lane baroh ar”, la maham u Deputy Labour Commissioner katkum ka thymmei khubor ba la pynlait da ka sorkar.
U la byrngem ruh ba kito kiba pynkhein ia kane ka ain, kin shah trei beit khlem kano kano ka jingmap satia.