Ka Maian bad ka Saians u Khasi halor ka Diengiei

Babu Kular Khongjirem

Myn shem taiew, ki nongpule ki la ioh ban pule bad ioh jingshai khyndiat shaphang ka saians(science) u Khasi hyndai halor ka snam shi ing shi sem(genetic family).Mynta ka taiew pat ngin ia pule pat sa shaphang ka maian Blei u Khasi halor ka khana shaphang ka Diengiei hyndai. Ka khana jong ki longshwa-manshwa jongngi ka iathuh ba,hyndai kulong kumah, hadien kata ka Sotti Juk(ka juk jong ka Hok ka Shikyntien),ka wan sa ka juk jong ka Diengiei(ka Juk jong ka pap ka sang).Ka dei ruh kata ka juk kaba la synshar bad pyniaid da ka pap ka sang,ka sniew ka smeh suda,ka thok ka shukor bad ka arsap ka ar phong suda ia u khun bynriew kumba long kane ka Kuli juk jongngi mynta.Hynrei,da ka jingiarap bad jingbatai lem ka sim Phreit, u khun bynriew(u Khasi mynshwa) u la lah ban pnkhyllem biang ia kata Diengiei hapoh ka jingialam jong uta u Sormoh u Sorphin,u Biskorom,etc.U Khla uba la ju wan ban jliah man la ka miet ia kata ka Diengiei ba kan dap doh biang,u la ngat bad kum nguid lang ia u sdie,ka wailyngngong(wait lyngkut ba ju pom ia ki dieng heh).Kata ka Diengiei ka la kyllon shisha bad taplup ia ka ri Khasi-Jaintia baroh kawei.

Ki Khasi hyndai ki ong ruh,ba ha kito ki jaka kiba ngat ne ban ki tnad Diengiei, ki jaka ki la kylla them bad ha kito pat kiba lait na ki tnad Diengiei,ki jaka ki la kylla long lum ha ri Khasi-Jaintia jongngi.Ha kito ki jaka ba ki ngat ne ban ki tnad Diengiei ba kham heh,ka them(valleys) ka kham heh bad kham jylliew katba ha kito pat ki jaka ba ngat kiba kham rit, ki kylla them kiba kham rit bad kham jyndong. Ki lum ruh ki don kiba kham heh ne kham jrong bad don ruh kiba kham rit bad kham lyngkot katkum ka jingheh ne jingrit bad jingkhlain bor jong kita ki tnad Diengiei.Ki ong ruh,hana,ba dei na ka jingpyut jong kita ki tnad Diengiei kiba la khyllem bad pyiar kylleng ka ri Khasi-Jaintia hyndai ba sa kylla ne mih ki mar poh khyndew kylleng ka ri Khasi-Jaintia jongngi.Ka jingkynrei jong ki mar pohkhyndew(minerals) kum u dewiong,u mawshun,u mawlein,etc ha ri jongngi ka dei na ka jingpyut noh ka Diengiei da ki spah million snem mynshwa.Hynrei ha kito ki jaka ba ki tnad Diengiei ki kham don kiba kham sad(kha-ngai dieng),ki kylla ruh sha ki mar poh khyndew ba kham kordor bad kham khlain bor kum u Uranium sha ki thain Wahkaji-Damiasiat,etc.

Kane ka maian Blei u Khasi hyndai ka la pynkyndit bad pynlyngngoh lut ia ki ‘riewstad saians(geologists) kiba la pynshisha ba kine ki mar poh khyndew ki mih na ki daw jong ki jingpyut noh jong ki dieng ki siej,ki jaboh jabain(sediments) hajar bad phew hajar snem mynshwa.Kine ki sediments ki kylla long noh kum ki maw(rocks) ba la ju tip kum kita ki Sedimentary rocks.U mawshun,u dewiong,dewbyrtha,etc ki dei ki sedimentary rocks kat kum ki geologists.Haba kumta,hato kham stad ki Khasi hyndai ne kham stad ki riewstad saians(geologists) jong kane ka juk mynta ne? Ngin ieh ha ki nongpule ba kin pyrkhat bad bad wad bniah(research) halor kane ka phang.