Ba kren tohmet ia kawei ka longkmie, phah song jain ka HITO SWKH ia u doktor

Shillong 05 Nailar: Na kaliang ka Hynniewtrep Integrated Territorial Organization (HITO) SWKHD mynta ka sngi nyngkong ka 5 tarik Nailar 2024, hadien ba ka la ioh ia kawei ka video lane ka durkhieh, ha kaba u wei u doctor ia u ba la tip u bah W. Dkhar u la kren tohmet ia kawei ka long kmie kaba na ka shnong phot Tdei south west khasi hills.

Katei ka jingjia kadei ka ba la jia mynta ka sngi ha CHC Mawkyrwat katba katei ka longkmie ka dang leit shim dawai.

Kumta hadien ba ka seng ka la ioh jingtip ka la leit mar mar, ban ia kynduh markhmat ia u tei u doktor bad Kumjuh ruh ia ka tei ka long kmie

Ha ba kren ha kane ka sngi nakalaing ki nongialam ka seng HITO ki la iathuh, ba katei ka longkmie ka leit ban shim dawai ha katei ka CHC Mawkyrwat, namar ka jingshitom jur jong u khun, hynrei hadien ba katei ka longkmie ka la poi ha katei ka jaka shim dawai uwei u doktor u la kren tohmet pynban ia katei ka longkmie.

Hadien ba u tei u doktor u la kren tohmet ia katei ka longkmie, ka la hap ban mih noh na ka CHC bad ban leit wad dawai noh na ka jaka sumar shimet (private hospital) hynrei kam shem la ioh dawai wat haduh ka shiteng sngi ruh, la bynrap ka seng.

Shuh shuh la iathuh ruh, ba u tei u doktor ym tang mynta ka sngi ba u leh kumne ia ki nongpang, hynrei man kapor ha u leh kumne ia ki paidbah. Kumta ka seng da kawei ka sur ka la maham jur ban beh noh shisyndon ia une u doktor na ka CHC Mawkyrwat namar ka jingleh riewkhlaw.
 
Ka seng ka la ai por ruh shi taiew, ba ia u tei u doktor dei ban weng noh mardor napoh kane ka CHC.