Pom naphang ki briew ka tnat khlaw ka District Council, ia ki jingthung jingtep jong ki briew ha Umladoh

Nongpoh, 04 Nailar: Ki briew ka tnat khlaw jong ka Khasi Hills Autonomous District Council (KHADC) Lailad Beat, hynnin ka sngi ki la leit ban pom naphang ia ki jingthung jingtep ba la thung da ki briew kiba don ha shnong Umladoh, ka shnong kaba don ha ki thain Lailad ha Ri Bhoi bad kaba hap ha Nongpoh Constituency.

Ki jingthung jingtep ba ki la shah pom pathar ha ki briew ka tnat khlaw jong District council, ki kynthup ia ki tynrai dieng kwai, ki tynrai kait, ki tynrai soh niamtra, sohtrun lem bad kiwei ki jait jingthung.

Shwa jong katei ka jingjia, la ong ba ha ka sngi Palei jong ka Taiew, ki la don ki briew na ka tnat khlaw ka District council, kiba la leit ban kren ia ki trai jong kitei ki jingthung bad kiba la kyntu ia ki, da kaba ong ba ki dei ban weng noh ia kitei ki jingthung, hynrei khlem poi pyrkhat ba hynnin ka sngi, ki briew ka District council, ki la leit ban pom naphang beit ia ki jingthung jingtep jong kitei ki briew.

Ha katei ka jingjia ki don kumba 5 tylli ki longiing, kiba la ngat ha katei ka apot, kata ki kynthup ia ka jaka jong ka Kong Prin Umsong, ka Kong Brina Sylliang, Kong Slis Lyngdoh, Kong Ormilis Lapang bad ka Kong Phiarnes Sylliang, ha kaba lyngba katei ka jingleh ki briew ka District council, ka la ktah eh ia ka mynsiem jong kitei ki longkmie, namar ba ki thung ia kitei ki mar rep, kam dei ka kam kaba ktah ne pynjot ia ka mariang.

Kitei ki longkmie, ki la pynpaw ia ka jingsngewsih kthang bad pangnud kaba khraw halor katei ka jingjia bad kiba la sngew shempap bad khlem lah ban mutdur ba kan jia kumtei, ha kaba ki jingthung jingtep ba ki la thung bad sumar bha, ki la shu shah pom bad shah pynkhyllem jubor khlem da kynjoh ktien ne pyntip sha ki trai jong kitei ki jingthung jingtep.

Haba iadei bad katei ka jingjia, u Bah Wet Syngkli, Rangbah Shnong ka Umladoh, u la ong, ba katei ka jingleh da ki briew ka tnat khlaw ka District council, ka la pynduhnong bad ktah mationg ia ki nongshong shnong bad khamtam eh kito ki longing, kiba la ngat ha katei ka apot, ki dei kiba kamai mynsngi bad bam mynmiet.

Utei u rangbah shnong, u la ong ba na ka liang ka shnong ka pynrem jur halor katei ka jingjia, namar kum ki briew kiba peit ia ki kam khlaw ka District council, ka la long kumba ki iuh roit ia ki longiing baduk khamtam ki nongrep jong ka shnong ka thaw.

Namarkata, na ka liang ka shnong ka dawa na ki bor ba dei peit ban bishar ia kane ka jingwan leh donbor jong ka tnad District council bad ban ai ia rai kaba hok ia kine ki longiing kiba mad ia kane ka apot, u la bynrap.