Kylla ktien ka MPSC, ym lah ban pyni paidbah ia ki marks jong kiba ialeh eksamin MCS

Shillong:Ka Meghalaya Public Services Commission (MPSC) mynta ka sngi, ka la pyntip, ba kam lah ban pynmih paidbah ia ki marks jong kito kiba ialeh ia ka eksamin MCS bad la iathuh ba katei ka dei na ka jingkyrpad hi jong kito ki hi ki samla kiba ia khun ia kane ka eksamin, namar ba ka ktah ia ka kam shimet jong ki lane ka Right to Privacy jong ka Fundamental Right katkum ka Article 21 jong ka Riti Synshar ka Ri India. Hynrei la pynbna ba lada kita ki samla ki kwah ban peit ia ka Mark lajong, ka Commission kan ailad ia ki.

Hynnin ka sngi palei, ka Khasi Students Union (KSU) ka la leit tur kyndit sha ophis jong ka Meghalaya Public Service Commission (MPSC) hadien ba ka la ai por 48 kynta ba kan pynbeit biang ia ka Result kaba ka MPSC ka la pynmih na ka bynta ki samla kiba iakhun kam sorkar.

Tang hadien katto katne por, u Chairman ka MPSC u la khot ia kren ia ki nongialam jong ka KSU bad hadien ka jingiakren u Chairman jong ka Employment and Monitoring Cell jong ka KSU u samla Reuben Najiar u la iathuh ba ka jingiakren ka long kaba sei soh, namar ba ka MPSC ka la kular ba nangne shakhmat haba ka pynmih ia ka risod kan da pyni lang ruh ia ka jingioh Mark jong ki samla kiba ia khun ia ka eksamin. Kumta ka KSU ruh ka la sngewhun ia kane bad ka la sangeh noh ia katei ka jingiakhih jong ka.

Hynrei ha ka sngi kaba bud, kane ka jingkular jong ka MPSC ia ka KSU ka kylla pynban da khongpong ha kaba u Secretary jong ka MPSC u la pynmih ia ka jingpynbna ba yn ym lah satia ban pyni paidbah ia ka Mark jong ki samla kiba ia khun ia ka eksamin MCS.