Katba dang tuklar ki politishian, kan iai mih ka kynrum kynram ka MPSC, ong ka KSU

Shillong: Ka Khasi Students Union (KSU) mynhynnin ka sngi ka la tar lyngkhot lyngkhai bad thang ia ka jubab kaba la phah ka Meghalaya Public Service Commission (MPSC) namar ba kam iahap eiei kumba ka seng ka la pan ia ka jubab. Ka la rai ruh ban shong kyrain hakhmat ka ophis haduh ba kan ioh ia ka jubab kaba shai kdar ban dawa pynbeit ia ka kynrum kynram bad ka jyrsieh ha ka Meghalaya Public Service Commission (MPSC).

Halor kane, u Chairman ka MPSC ula hap ban khot iakren ia ki nongialam ka Khasi Students Union (KSU) hadien ba kila leit ban rah plakad bad thang ia ka jingpynshai ka bym shohtoh eiei.
Hadien ba la mih na kamra u chairman, u samla Reuben Najiar uba dei u dei u Chairman ka Employment Monitoring Cell ka KSU, u la ong ba u Chairman bad Secretary ka MPSC ki la kular ban pynlait paidbah noh mynta hi ka Sngi ia ki marks kiba ioh kiba iakhun ia ka examin MCS, katba na ka bynta ka kam MPS pat u la iathuh ba ka seng ka la dawa ba dei ban khot interview beit ia baroh 43 ngut ym tang ia ki 27 ngut, da kaba dawa ba dei ban khot katkum ka ratio ba la buh. Hynrei, ka MPSC ka la kubur ba la don ka jingtyngkhuh ha ka ain, hynrei ki heh ka MPSC ki la kular ban sa pyntip mynta hi ka Sngi ia kita ki jingbym biang sha ki dkhot ka KSU.

Ha kaba iadei bad ka kam Statistical Officer, ha A.H Veterinary u la ong ba ki heh ka MPSC ki la kubur ba ki la bakla haba pynmih ia ka advertisement namar ka long na ka bynta 2 ngut katba la pynmih pat ba donkam tang kawei, bad halor kane ruh ka MPSC ka la kular ban phah ia ki kot ki sla kiba dei sha ka KSU.
U Reuben u la ong ruh ba ka jingkynrum kynram ha ka jingtreikam ka MPSC kan iai jia namar ba la bun kita ki political appointee lane ki briew ba la shu thung pynsngewbha politic, bad halor kane ka seng kan leit ban dawa na ka Sorkar ba dei ban weng noh ia baroh kito kiba la shu thung pynsngewbha, ban lah ban pynbeit pynthymmai pat ia ka MPSC.

Shwa ia kane, ki dkhot ka seng kila ialum ruh khrui hakhmat ka ophis ka MPSC ha Lachumiere ban dawa na ka MPSC ba kan ai ka jubab kaba shai halor ka jingmih ka kynrum kynram ha kane ka tnad pyniaid ia ka jingthungkam ha ki tnad sorkar.
Ka jingleit tur ki dkhot ka KSU sha ka ophis ka MPSC ka dei hadien ba ka lut ka jingai por 48 kynta ba kan pynshai bad pynbeit nalor ban thung ia ka jingtohkit kaba laitluid.
Dang shen ka KSU ka la pynpaw ba kam sngew iahap ia ka jingpynshai ka MPSC kaba mih ha ki lad pathai khubor ha u 26.07.2024 ban pynksan ia ki jingleh thurmur jong la jong khlem da sngewkhia ba ki lehkai bad ka jingim ki samla jong ka jylla.

Ka Seng, ka la dawa na ka MPSC ba kan pynlait paidbah ia ki mark jong baroh kiba ialeh ia ka MCS (prelims) examination bad ban thung ia ka “Independent Inquiry” ha kaba iadei bad kane ka bynta.
Ka la dawa ruh ban pynshai halor ka jingduna ki samla kiba shah jied ha ka personal interview jong ka MPS. Katkum ka advertisement jong ka MPSC, ka pyni ba yn jied ia ki samla sha ka personal interview katkum ka ratio 1:10 haduh 1:2.5 na ka post ba lait. Namar ba la pyllait ia 17 tylli ki kam ha u snem 2019, kaba duna tam ban shah jied ha ka personal interview kan dei 42 ne 43 ngut, hynrei la iohi ba ki jied tang 27 ngut ba kane ka la pynkheiñ ia ka kyndon kaba ka MPSC kaba lah buh. Ka Seng ka buh ka dak jingkylli ba shaei kita ki 15-16 ngut ki samla ki jah bad kim shim lah mih kyrteng na bynta ka personal interview.

U samla Reuben Najiar u Chairman, Employment Monitoring Cell, u la ong ba ha kaba iadei bad ka resol jong ka Statistical Officer, A.H Veterinary ka la jied ia 2 (ar ngut) ki samla, iwei na ka Khasi-Jaintia category bad uwei na ka Garo category katkum ka notification ba lah pynlait ha 27.06.2024. Hynrei kaba sngew lyngngoh ka long ba katkum ka advertisement ba la pynmih ha ka 14.12.2020 pat, ka jinglait kam ka dei tang na bynta 1 (kawei) bad ia kane la pynskhem biang da ka Corrigendum ba lah mih ha ka 14.09.2022 kaba dei ban dei thik tang ia kawei ka post na bynta Khasi-Jaintia category.