Shi bnai, palat lak ka tulop ki nurse shabar ri; 121ngut kin leit trei na Meghalaya sha UK, Japan bad Singapore

Shillong:Kin don 121 ngut Nurse kiban leit trei shabar ri kiba dang shah hikai pyntbit ha ka ktien bad kiwei ki kam shwa ba kin mih sha United Kingdom, Singapore bad Japan.
Kham myn shwa, 11 ngut kila dep leit sha Japan ha kaba u myntri rangbah ka jylla u Conrad K Sangma ruh ula leit synran lang ia ki.

Ka myntri ka tnad ka koit ka khiah ka jylla, ka kong Ampareen Lyngdoh, ka la ong ba na kine ki 121 ngut, ki don 27 ngut kiba kwah ban leit trei sha Japan, 44 ngut sha Singapore bad 50 ngut sha ri Bilat.
Ia mynta ki don ha ka jingpynkhreh ban pynbiang ia ki jingdonkam kum ka Visa ban leit sha kito ki ri bad ka jing shah hikai ba kin nang ban kren ia ki ktien bad ha ka taiew baar jong u Nailur kin leit sha kitei ki ri.
Ka sorkar ka la iasoi ia ka jingiateh bad ki agency ba kin ialam ban pynioh kam Nurse sha ki ri bapher bapher na kane ka jylla bad ka la iasoi soskular ruh, ha kaba kin ioh ia ka tulop, ka jingshngain bad kiwei ki jingdonkam. Katkum ka jingiathuh ka myntri, ka sorkar jylla kan iarap shiteng ia ka jingsiew kaba ki dei ban siew sha ki kompeni bad hadien ba kila trei, kin sa pynphai pat haduh ba kan khuid.

Ka tulop kaba ki ioh kam duna ia ka 1 lak haduh 1lak shiteng ha ka shi bnai.
Ka sorkar jylla ka la shim ia kane ka sienjam lyngba ka mang tyngka kaba kyrpad na ka sorkar jylla bad sorkar pdeng.
Haba iaroh ia ka jinglong smat bad ryntih ki samla na kane ka jylla, ka myntri ka la ong ba ka jinglong jong ki khynnah na kane ka jylla ka khampher, ki smat, ki phikir ia ka rukom jingsumar, ki long kohnguh bad ka rukom im rukom bam kam long kaba pyrkhing nalor ba ka jinglong ka suin bneng ruh ka iasyriem kumba long ha kane ka jylla bad kane kan iarap ia ki ha kiba bun ki bynta.

Ha kajuh ka por, ka la ong ba ka sorkar kam lah ban pynbiang lut ia ki Nurse kiba la pyndep da ki hajar bad kane ka dei ka lynti ban pynsting ia ka jingkhia ka jingkyrduh kam.
Ka la iathuh ba ka jingdon ki nurse kiba khlem kam ka la jur bha ban ia ki kam kiba don ha ki tnad ka koit ka khiah bad dang shen, ia kam Nurse kontrak kaba lait tang 380 tylli, hynrei kiba aplai ki don haduh 1700 tam eiei.