Ha ka advertisement pynbna tang kawei ka kam, thung pat 2ngut Khasi bad Garo; 48 kynta ai por ka KSU ïa ka MPSC

Shillong:Ka seng Khasi Students Union (KSU) ka la aipor 48 kynta ïa ka Meghalaya Public Service Commission (MPSC) ba kan pynshai ïa ki kynrum kynram kiba mih na ka eksam thungkam Ophisar MCS, MPS bad Statistical Officer ka Tnad Animal Husbandry & Veterinary.

Ka KSU lyngba ka Employrment Monitoring Cell, hynne ka sngi Ba-ar, kala leit buh da ka dorkhas hakhmat u Chairman bad Secretary ka MPSC ba pynpaw ïa kane ka jingaipor.
“Ka Seng kam sngew ïahab ïa ka jingpynshai jong ka MPSC kaba mih ha ki lad pathai khubor ha u 26.07.2024 ban pynksan ïa ki jingleh thurmur khlem da sngewkhia ba ka ïalehkai bad ka jingim ki samla jong ka jylla,” ong u samla Reuben Najiar Chairman ka Empoyment Monnitoring Cell ka KSU.

Ha kane ka dorkhas, ka KSU ka la dawa ïa ka MPSC ban pyllait paidbah ïa ki marks jong baroh kiba ïakhun ïa ka eksam MSC (prelims) khnang ba ki nongïaleh eksamin kin shai halor ka jingshah jied bad shah kyntait jong ki ban ïoh ïaleh ïa ka eksam (mains). Ka seng ka dawa ruh ban thung da ka kynhun tohkit ba laitluid halor kane ka kam.
Ka KSU ka la dawa ruh ban pynshai halor ka jingduna ki samla kiba shah jied ha ka personal interview jong ka eksam MPS.

“Katkum ka advertisement jong ka MPSC, ka pyni ba yn jied ïa ki samla sha ka personal interview katkum ka ratio 1:10 haduh 1:2.5 na ka post ba lait. Te namar ba pynlait ïa 17 tylli ki post ha u snem 2019, kumta ba duna tam ban shah jied ha ka personal interview kan dei 42 ne 43 ngut, hynrei la ïohi ba ki jied tang 27 ngut bad kane ka la pynkheiñ ïa ka kyndon kaba ka MPSC hi ka lah buh,” ong ka KSU.
Ka KSU ka buh ka dak jingkylli ba shaei kita ki 15-16 ngut ki samla ki jah bad kim shym lah mih kyrteng na bynta ka personal interview.

Haba phai sha ka result jong ka Statistical Officer ka tnat Animal Husbandry & Veterinary, ka KSU ka la kdew ba la ïohi ba la jied tang 2 ngut ki samla, iwei na ka Khasi-Jaiñtia category bad uwei na ka Garo category katkum ka jingpynbna ba la pyllait ha ka 27/06/2024.
“Kaba sngew lyngngoh ka long ba katkum ka advertisement ba la pynmih ha ka 14.12.2020 pat, ka jinglaitkam ka dei tang na bynta 1 (kawei) ka post bad ïa kane la pynskhem biang da ka Corrigendum ba lah mih ha ka 14.09.2022 kaba dei ban dei thik tang ïa kawei ka post na bynta Khasi-Jaiñtia category,” ka la kdew.
Ka Seng ka lah buh ka jingmaham ïa ka MPSC ba lada kam lah ban pynbeit ne pynshai halor kine ki bynta hapoh 48 kynta, ka Seng kan shim ïa la ka jong ka sien jam.