![](https://www.urupang.com/wp-content/uploads/2024/07/image-109.png)
Shillong:Ka Meghalaya State Coordination Committee of the Coal Owners, Miners, Exporters, Transporters and Dealers Forum (MSCCCOETDF) ka la rai ban pynlong da ki jingïalang paidbah ha kylleng ki jaka ban pynbor ïa ka Sorkar Jylla ba kan pyndam noh mardor ïa ka Standard Operating Procedure (SOP) ba kynnoh be-aiñ, ha ka ban ai Licence lane ka Mining Lease ïa u dewïong hapoh ka Jylla.
“Ïa kane ka rai la shim hadien ba ka Sorkar Jylla kam shym la lah ban leh eiei ïa kane ka kam wat hadien ka jingaiti ïa ka dorkhas ha u Myntri Rangbah ka Jylla Conrad K Sangma myn ha ka 2 tarik Naitung,” ong u dkhot ka Forum u Bah Reginald Shylla haba ïakren bad ki nongthoh khubor ha ka sngi ba ar.
Ula pyntip ba ka forum kan pynlong ïa bun ki jingïalang paidbah ha kylleng ki District ba don kyrhai u dewïong hapoh ka Jylla, ban pynsngewthuh ïa ki paidbah halor ka SOP ba la pynmih da ka Sorkar Meghalaya kaba 5 tarik Lber, 2021, kaba mar pyrshah ïa ka Mining and Minerals (Development and Regulation) Act, 1957 bad kane kajuh ka jingpynbna (SOP) ka dei kaba la pyntreikam da ka Jylla Meghalaya shabar na ki nongrim jong ka aiñ.
Ka SOP ka la kdew ba ka jingai ïa ki prospecting licence lane mining lease ïa u dewïong ha Jylla Meghalaya kan long tang ïa ki jaka ki bym duna ïa ka 100 hectare.
“Hynrei, kane ka SOP ka la pynduhlad ïa ki trai riewlum ka Jylla kiba don ïa ka jaka ba duna 100 hectare ba kin aplai ïa ki licence na ki bor ba dei khmih,” ong u Bah Shylla haba bynrap, “Ngi sngew ïahab ban ong ba kane ka SOP ka dei kaba pynmyntoi tang ïa ki hehspah bad pynduh lad ïa ki briew kiba don duna ïa ka 100 hectare ka jaka. Namar kata, ki briew kim don lynti lait na ka jingdie ïa ki jaka sha kine ki hehspah, kaba thew sha ka jingïuhroit ïa ka khyndew ka shyiap u paidbah”.
U la kdew ruh ba ka Mineral Concession Rules, 2016 bad ka amendment ba 11 tarik Naitung, 2017, 29 tarik Kyllalyngkot 2018, 20 tarik Nohprah, 2018, 24 tarik Kyllalyngkot, 2019, 21 tarik Nailar, 2020 bad 16 tarik Kyllalyngkot, 2021, kim shym la don ïa ki kyndon ba ailad ne aibor ïa ki briew kiba don jaka ba hapoh 100 hectare ba kin aplai ïa ki licence/mining lease.
Nalor kane, u Bah Shylla ula pyntip ba ka Forum ka la leit ïakren ruh ïa laingut ki MP kata u MP ka Tura Saleng A Sanma bad MP ka Shillong Ricky AJ Syngkon bad u MP ka Rajya Sabha, Dr WR Kharlukhi, ba kin tuklar lem mardor bad rah ïa kane ka kam ha Parliament lem bad ka Ministry of Coal khnang ban wad ïa ki lad ki lynti ha kaban leh eiei ïa ki jingeh ba la mad ïa ki paidbah ka Jylla haba phai sha ki kam dewïong.
Ula pyntip ba ka Forum ka la leit rah ruh pyrshah ïa kane ka SOP hapoh ka Ïingkashari Meghalaya High Court.
“Kane ka long namar katkum ka MMDR Act, 1957 la ong ba ka jaka ba duna eh na ka bynta ka mining lease ka dei ban long ym duna ïa ka 4 hectare kaba mut ba ngi lah ban aplai ïa ka propecting licence hynrei ka jingkylli ka mih mynta ba na kane ka kyndon aiñ, ka Sorkar Jylla ka la buh ïa ka jaka ba duna eh ban long haduh 100 hectare. Kane ka pyni ba ka Sorkar ka kwah ban ïuhroit ïa ka kamai jakpoh jong ki briew bad thombor ïa ka hok jong ki paidbah tang ban pynmyntoi ïa ki katto katne ki nongkhaii hehspah,” ula kynnoh.
Phi don ban ong eiei?