Bun palat ki kali shimet na Assam, kiba kamai sha Meghalaya, ong ki Taxi

Nongpoh:Ha ka jingialang kaba la long hapdeng ka kynhun ki nongniah Tourist Taxi na Meghalaya bad Assam, kaba ki la pynlong mynta ka sngi ha Nongpoh, ka jingialang jong ki, ka la long kaba seisoh bad ba kim don kano kano ka jingiadon daw ne bym iasngewthuh hapdeng ki para nongniah Tourist Taxi, hynrei lyngba katei ka jingialang, kaba ki sngewkhia eh ka dei halor ka jingbun palat ki kali shimet na ka jylla Assam, kiba la kylla long kum ki kali ban kamai paidbah sha Meghalaya.

Haba la kut katei ka jingialang, ki nongialam ka kynhun jong ki nongniah Tourist Taxi na Meghalaya bad Meghalaya, kiba kynthup ia u Tilang Nongbet, President ka Hynniewtrep Tourist Taxi Association lem bad u Robbin Dutta, President ka Greater Guwahati Tourist Taxi, ki la ong ba ka jingbun palat ki kali shimet kiba na ka jylla Assam, ba kamai paidbah na Assam sha Meghalaya bad khamtam eh ki kit ia kiba shangkai pyrthei sha Meghalaya, ha kaba kane ka la ktah shikatdei eh ia ki nongniah Tourist Taxi, nalor ba ki hap ban siew ia ka khajna kaba heh sha ka sorkar.

Haba iadei bad pat bad ka jingbat bad pynphai ki dkhot ka HNYF ia ki kali na Assam ha Umtyngar bad kaba la jia dang ha kine ki khyndiat sngi, na ka liang kitei ki nongialam jong ki Tourist Taxi na Meghalaya bad Assam, kim don eiei ban kren pyrshah ia ki HNYF, namar ki sngew ba ka dei ka kamram jong ki ban iakren bad ka sorkar.
Ki la ong ruh ba katei ka jingialang kaba mynta ka sngi ha Nongpoh, ka long ruh kum shibynta ban pynshai sha ki paidbah, kiba la sngewthuh bakla halor katei ka kam ban bat ia ki kali Assam kiba wan sha Meghalaya, ha kaba kum ki nongniah Tourist Taxi kim don bynta eiei ruh em halor katei ka jingpyrshah ia ki kali kiba na Assam, ba kin wan sha Meghalaya.

Lyngba katei ka jingialang, ngi la ioh ban iamir jingmut hadien ka jingmih ki khubor hamsaia, ba ka la don kata ka jingthmu khang pyrshah ia ki kali na Assam ban kiew sha Meghalaya, hynrei kum ka kynhun jong ki nongniah Tourist Taxi, ki la pynshai paidbah ba kam don kaba kum kata, namar ki nongniah kali kamai na Meghalaya bad Assam, ki don ka jingiatreilang bad kim kwah ban mih kano kano ka huri hura hapdeng ka jylla Meghalaya bad Assam.