Ki samla na jylla, kin ioh kam sha UK, Japan kin kamai T.1.2lak shibnai, ong U MR

Shillong:U myntri rangbah ka jylla Meghalaya u Conrad K. Sangma ha ka sngi Thohdieng u la ong ba ka sorkar jylla ka pyndap ia ka jingduna hapdeng ka jingdawa bad ka jingbiang na ka bynta ki kam shabar ri da kaba pyniasoh ia ki samla bad ki tnad kiba lah ban shaniah.

“Kum ka sorkar ngi la tuklar ban pyniasoh ia ki samla jong ngi bad ki agency. Ngin sa bei tyngka ia ka jinghikai jong ki haduh Rs. 50,000, kyrshan ïa ki ha ka jingïaid lynti jong ki ban ïoh kam shabar ri, bad pynsuk ïa ki visa bad kiwei kiwei ki kot ki sla kiba donkam,” ong u Myntri Rangbah ka Jylla haba ai jingkren ïa ki samla ha ka Job Fair na ka bynta ki kam shabar ri kaba la long ha ka district auditorium ha Tura, West Garo Hills.

U la ong ba ka sorkar ka la rai ban kyrshan ia ki jingpynrung kam shabar ri namar ba ka don ka jinglah kaba khraw ha ki ri kiba la kiew namar ka jingbun briew jong ki kaba la nang tymmen. “Lada ngi lah ban phah 1,000 ngut ki samla sha ki ri kum ka Japan, Singapore, bad UK, kin kamai kumba Rs. 1.2 lak shibnai, bad kan sa lah ban pynduna ïa ka pisa, kaba ha kajuh ka por kan ïarap shibun ïa ka jingïoh pisa bar ri jong ka jylla jong ngi,” u la ong.
“Ka jingbun briew jong kiba bun ki ri kiba la kiew ka la nang tymmen bad kim don ïa ki samla kiba biang kiba trei. Haba ka ri India ka don ia ka jingbun briew kaba dang rit tam ha ka pyrthei, bad kham samla tam ha ka jylla Meghalaya, ka don ka lad ban weng ia kane ka jingduna da kaba phah ia ki samla kiba la pynkhreh ban ioh kam ban trei sha kine ki ri hadien ba la ioh jinghikai bad jingkyrshan kaba biang ha kaba iadei bad ki kot ki sla na ka Sorkar,” u la bynrap.

Haba ïakren shaphang ka jingwan jong u sha Japan, u Myntri Rangbah ka Jylla u la ong, “Arngut ki nurse na Meghalaya kiba la shah buh ha Kobe, Japan ki sngewkmen haduh katta katta na ka bynta ka lad ban trei hangtei. Nga la iakynduh shimet ia ki ha Kobe bad nga la iakynduh ruh ia ki nongpyniaid jong ka hospital. Tang kane ka hospital ka donkam 700 ngut ki nurse man la u snem. Ki donkam ïa ka bor treikam kaba dang samla namar ba ka ri jong ki ka ïakynduh ïa ka jingduna ki samla ban trei ha ki bynta bapher bapher.”
“Ka don ka jingdawa kaba khraw ym tang ïa ki nurse ha ka liang ka koit ka khiah hynrei wat ha kiwei pat ki bynta kum ka kam pynpoi marbam, ka liengsuiñ, ka kam pdiang sngewbha, ka jingrwai, bad kiwei kiwei,” ong u Myntri Rangbah ka Jylla da kaba pynpaw ba ki samla jong ka jylla jong ngi ki lah ban shim ïa kane ka kabu.

Ha ki khyndiat bnai ban wan, 27 ngut ki samla na kane ka jylla yn buh ha Japan, 44 ngut ha Singapore, bad 50 ngut ha UK ha ka kam sumar.
Haba pynpaw ia ka jingsngewkhia halor ka jingsheptieng bad ka jingduna jingshaniah, u Myntri Rangbah ka Jylla u la pynkhamti ia ka Meghalaya Skill Development Society (MSSDS) bad ka tnad Labour, Employment & Skill Development Society ban wad ia ki agency kiba biang na ka bynta ki jinghikai skill, language training, language training, bad ka jingbuh kam.

“Ki samla jong ngi ki lah ban shaniah ha kine ki agency kumba ngi la ithuh ïa kiba bha tam, kumta ym don ei ei ban tieng. Ngi buh hakhmat eh ïa ka jingshngaiñ jong ki nongshong shnong jong ngi katba ngi pynthikna ba kin ïoh ïa ka kamai kaba don jingmut,” u la bynrap.