Shillong:Ka samla Ridahun Iakai, kaba na Umkyrpong, East Jaintia hills, ka la pyntip ha U Rupang, ba ha ka sngi thohdieng, ka la klik ha kawei ka site ha Instagram, kaba ai kyrteng The deals spot deals in original phones, namar ba ka kwah ban thied ia kawei ka iphone 15 Promax, kaba shongdor T.1.95,000 bad tang shu klik ha katei ka jaka, ula phah mesej uwei u briew bad haba ki la mesej kylliang, katei ka samla, ka la wad dor ia katei ka iphone bad utei ruh ula tyrwa, ha ka dor T.15hajar bad mar kumta hi, ula phah siew boina kaba long T.599 bad kaba pyni, ba ka la thikna ba kan thied ia katei mar bad u da pynthikna, ba katei ka dei ka jingtyrwa kaba kyrpang (special offer) bad ba un pynpoi ia ka phone hapoh 2 sngi.
Hynnin ka sngi pat, ula pan pisa ba kan siew sa T.59,200, da kaba kular ba un pynphai noh ia katei ka pisa sha ka account jongka bad katei ka samla ruh, kaba shong ba sah ha Noida, ka la siew ia katei ka pisa ha kawei ka account kaba ai kyrteng Amar Deep Bhati, hynrei kham hadien, ula pan pisa biang sa T.20,800, da kaba u ong ba ka dei ka bai GST bad u da kular ban pynphai noh ia katei ka pisa kaba long T.80 hajar hapoh lai minit, ynda ka la dep siew bad haba ka la sngew artatien, kumta kam shym la siew shuh satia ia katei ka pisa kaba T.20,800 bad ka la dawa ruh ba un siew noh ia katei ka pisa kaba ka la dep siew kaba poi sha ka T.60hajar bad ka dei ha katei ka por, ba ka la mih ka jing iamai bad utei u dkhar bad ba ula kren ruh da ki ktien kiba sniew ia katei ka samla.
Kat haduh ba thoh ia kane ka khubor, katei ka samla, kam shym la ioh satia ia katei ka tiar, kaba ka la siew pisa bad kam shym la ioh biang ruh ia ka pisa kaba ka la dep siew sha ka account jong utei u nongthok nongshukor ia ka bad la iathuh ba ka ladep ujor ha ka cyber crime ha Noida, halor katei ka jingjia.
Phi don ban ong eiei?