Ka jing burom niam, ka jingdawa jong ka por: Stephenson Mukhim

Jowai, 2 Jylliew:
U Parliamentary Secretary ba dei khmih ia ka tnat ka kit ka bah bad kiwei kiwe jong ka sorkar Meghalaya, u ma Ste phenson Mukhim haka jingkren jong u kum u kongsan ha ka jingplie pyndonburom iaka jing rakhe iaka jingdap 125 snem jong ka Balang Unitarian ha ka shnong Nongtalang, ula ong ba ka jinghikai jong ka Balang ban burom ia kiwei pat ki jingngeit niam ka dei ka nongrim kaba kane ka pyrthei mynta ka donkam. U kongsan uba plie pyrda ia ka jingrakhe ba shisnem lynter ia ka quasqui centenary ula ong ruh ba u sngewtynnad ban tip ba kane ka Balang ka hikai ia ka jingialong kawei bad ka jinglong shipara u khun bynriew haka pyrthei. Kum ka ri bad ka jaitbynriew ngi dei ban kiar na kito baroh kiba pyniapait ia pra ia ngi, la ong shuh shuh u ma Mukhim bad ngi dei ban ioh jinghikai ia kane ka jingshisha na kane ka Balang.
U kongsan ula iaroh ruh iaka jingshakri jong kane ka Balang ia ka shnong Nongtalang lyngba ki skul bad kiwei pat ki jingknerkti jingiarap. Lah ban pynkynmaw ba ka balang Unitarian ha Nongtalang ka dei kawei naki balang mane Wei Blei kiba rim tam ha kine ki thain. La seng ia kane ka Balang da u Rev. Hiah Pohlong ryngkat bad ka jingsynran jong u para jong u; u Riang Pohlong bad kane ka balang kaba la sdang naduh ka snem 1889, ka dei kaba ar hadien ka Balang Jowai kaba la seng da u nongseng rangbah u H.K.Singh Lyngdoh Nonngbri. Nalor ka jingrwai na ki khynnah bad samla jong kane ka Balang, la ioh ruh iaka jingkren na u Rev. E. Lyngdoh, Rev. H.H.Mohrmen, Rev. D.Pariat bad u MDC jong ka War Central uma Hollando Lamin. U Ma J Lyngdoh uba long u Secretary jong ka Celebration Committee ula iathuh ba ia ka jingrakhe jubili bad 125 snem jong ka Balang yn pynkut ha u bnai Nohprah. Ia ka jingialang la pyniaid da u Ma Biron Lyngdoh.