Mar ia khynra bar jylla; phone noh u MP, bad u ma Sniawbhalang ia u nongialam ka KSU

Shillong:U General secretary ka Khasi Students’ Union (KSU), u samla Donald V Thabah u la kam ba u Symbud Myntri Rangbah ka Jylla, u Bah Sniawbhalang Dhar bad u MP ka Rajya Sabha u Rakesh Sinha ki la phone ia u, hadien ba ka seng ka la bteng ban khynra ia ki kot ki sla jong ki nongbylla bar Jylla.

Katkum ka jingiathuh u nongialam ka KSU, ha ka 9 tarik mynta u bnai, u Symbud Myntri Rangbah u la phone, hynrei kaba sngew lyngngoh ba kiba bun ki Myntri Sorkar kim tip ia ka aiñ Inter State Migrant Workmen Act, kaba la pynkulmar khlieh ia kiba bun.
Shuh shuh u la ong ba kane ka jingkhih jong ka KSU kam shym la sahkut tang ha kane ka Jylla, hynrei ka la poi sha ki shkor jong ki MP sha Delhi, ha kaba u MP ka Rajya Sabha u Rakesh Sinha u la phone da kaba ong ba ka jingkhih ka KSU ka khanglad ia ka roi ka par.

U nongialam ka KSU u la iathuh ba u la jubab ia u MP ba ka jaidbynriew ka donkam ia ka jingiada namar ka don tang kumba 15 lak ngut ki trai Jylla, bad pyntip ba u Sinha u la tyrwa ban iakren bad u Myntri Rangbahduh ka Ri ban pynurlong ia ka jingdawa ILP bad ka jingithuh ia ka ktien Khasi ha ka khyrnit kaba Phra.
Ia kane u bah Donald ula iathuh haba kren ha ka jingkynmaw burom ia ka lyngkhuh sngi iap kaba 189 snem jong u Tirot Sing Syiemlieh ha madan Iewrynghep, Laitumkhrah, Shillong.

Ha kajuh ka por, u General Secretary ka KSU, u la pynrem jur ia ka jingleit buh ia u motdur jong u Tirot Sing ha Dhaka mynta u snem namar ha ka Sngi plie ia u mut la pynhiar dor ia ka kyrteng jong u Syiem Tirot lyngba ki riewshemphang, da kaba la pynpaw ba u Tirot Sing u la pyndem wait hakhmat ka Sorkar phareng.
Ka KSU ka la rakhe kynmaw tympang ia ka lyngkhuh sngi iap kaba 189 jong u Pa’iem Tirot Sing Syiem, u Syiem ka Hima Nongkhlaw, bad ia ka jingleh burom da kaba buh syntiew la pynlong hakhmat u mot ba shirynieng ha Madan Iewrynghep, Laitumkhrah Shillong.
Ha kane ka sngi ba kynmaw kyrpang ia une u khlawait la don ryngkat ruh kiwei ki sengbhalang ba kynthup na ka FKJGP, HNYF, RBYF, JSU bad ka HITO, ki nongialam jong ka Dorbar Shnong Laitumkhrah bad kiwei kiwei.