Ka bhah kam ba 87 percent, ka dei ia kiba duk, ong ka South Shillong

Shillong:Ka 19- South Shillong Advisory Committee, hapoh ka jingialam u MLA u bah Sanbor Shullai mynhynnin ka sngi ka la ai jingmut kyllum sha ka Expert Committee, ha kaba la kdew ba ka bhah ban ioh kam kadei ban ai jingmyntoi ia ki briew na ki longïing ba duk ba kyrduh.

U Bah Sanbor u la ong ba ka jingai jingmut ka long katkum ka khana sumari jong u snem 2011 kaba pyni ba ki riewlum ki don 86.15% kiba shong shnong ha Meghalaya.
U la ong ba ka bhah kam ka dei ban long 30% ia ki Khasi-Jaintia, 30% ia ki Garo, katba 27% ka dei ban long beit thik na ka bynta ki longïing ba duk lane kita ki Economically Weaker Section (EWS), shuh la ai jingmut ba na ka 87% kyllum ruh ka jingmang ia ki kam ka dei ban long beit na ka bynta kiba duk. Kumjuh ha ki kam ba lait ha ki district na ka 87% ka bhah kadei ban long 50% na ka bynta Khasi Jaintia bad Garo ha la kijong kijong ki district.

U la ong ba ka bhah na ka bynta kiwei pat kiba dang sah ka dei ban long 6% na ka bynta kiwei pat ki ST/SC bad ki OBC bad 7% na ka bynta ki unreserved.
Katkum ka jingong u Bah Sanbor ka Sanbor ka 87% kaba la mang na ka bynta ki Khasi -Jaintia bad Garo ka dei ban long na ka bynta ki khun jong ki nongniah kali kamai, ki ba shongdie dukan ha surok, ki ba trei bylla ha ki ïingbriew, ki nongbylla sngi, ki Asha bad Aaganwadi ki nongrep bad kiwei kiwei kiba trei bylla thoh mut thoh mat.