Ba kim rah ia ka Vote,khang ka shnong Laitdiker ia ar tylli ki longiing ban ioh skhim PMAY

Shillong 10 Naitung: Ki ar ngut ki longkmie na ki ar tylli ki longing kata ka kong Raibon Rani bad ka kong Merita Rani na ka shnong Lawkhla, East Khasi Hills, ha ryngkat ka jingwan synranlang u bah Wandonbok Jyrwa, ki la leit ban iakynduh biang ia u Block Development Officer (BDO) ka Mawphlang C & RD Block u bah K.T.Nongsteng ban pan jingshai halor ka jingshah pynsangeh bad khlem pyllait ia ka PMAY Scheme.

Ha ka jingiakren bad kilad pathai khubor, kitei ki arngut ki longkmie ki la pynpaw ka jingsngewsih, ba na ka Dorbar shnong Laitdiker ki la pyrshah ia kitei ki ar tylli ki longiing, ban pynsangeh ne pyllait ia katei ka scheme PMAY ka ba dei ka scheme shan iing, ha ka ba kitei ki ar tylli ki longiing kidei ban ioh byntalang na katei ka scheme.

Ha ka jingiakren bad kitei ki ae ngut ki longkmie ki la iathuh, ba ka kyrteng jingki ka la dep mih ha Kane ka scheme PMAY ka ba dei ka scheme ban shna iing, hynrei la shah ujor, ba kine ki ar tylli ki longiing ym dei ban shah ba kin shna iing ne ban pyllait ia kane ka scheme, da ka ba kynnoh ruh, ba kim don ia ka epic haka shnong Laitdiker.

Katkum ka jingujor ba la ioh pdiang, na ka Dorbar shnong Laitdiker lyngba u Sordar shnong bad u Secretary, ka long, ba ki pyrshah beit tang na kadaw ba kitei ki ar tylli ki longiing kim don ia ki Epic ha ka shnong Laitdiker.

Shuh shuh ki la iathuh, ba haba ki ioh ia kiwei ki scheme kim ju pynsangeh hynrei ka ba phylla kalong, ba ia katei ka scheme shna iing ba ki dei ban ioh, ki la shah pynsangeh noh ha ka Dorbar shnong Laitdiker ha ka ophis u BDO ka Mawphlang, da ka ba kynnoh ruh, ba kine ki longiing kim dei ban ioh ia kane ka scheme namar kidei tang ki ba sah ha u pud u sam jong ka shnong.

Katkum ka jingiathuh jong u BDO ka Mawphlang, ba ka jingbym pyllait bad pynsangeh ia katei ka scheme shna iing kitei ki ar tylli ki longiing kadei namar ba ka Dorbar Shnong Laitdiker ka la wan buh da ka jingujor pyrshah iaki, ba dei ban pynsangeh shwa.

Ka jingwan iakynduh jong kitei ki ar tylli ki longiing ia u BDO ka la long haduh 5 sien lynter, hynrei kim ioh ia ka jingshai, hynrei mynta ka sngi da ka jingwan synranlang u bah Wandonbok Jyrwa , nakaliang u BDO u la kular, ba ia katei ka scheme yn sa pyllait noh shen.

“Nakaliang u bah Wandonbok Jyrwa, ha ba kren sha ki lad pathai khubor u la ong, ba ka jingleh jong ka Dorbar shnong Laitdiker kam iahap ban shu pynsangeh beit ia ka scheme bad kam don hok ban shu khang beit jubor wat lada kim wanrah ia ka Epic sha ka Shnong”.