Ngi la ia kwah ban long noh ka elekshon MDC, ong U CEM KHADC

Shillong:U CEM ka KHADC uba dei ruh u nongialam ka NPP, u bah Pyniaid Sing Syiem u la ong ba baroh ki MDC kila kwah ban wan noh ka elekshon MDC namar ba ka la dei ka por.

Haba kren mynta ka sngi sha ki lad pathai khubor, u bah Pyniaid u la ong ba na ka liang jongu ruh ula long uba la pynkhreh na bynta ka elekshon MDC.
“Na ka liang jong ngi baroh, Ngi la kwah hi ban long noh ka elekshon namar ba la dei ka por. Bad ngi la long kiba la pynkhreh”, la ong u bah Pyniaid.

U Lat ka jylla u la pynjlan ia ka samoi ka KHADC bad ka JHADC sha ka 6 bnai, hadien ba kila leit ban pynbeit thymmai ia ki shnong ha ki konstitwensi jong kine ki ar tylli ki autonomous district council.
U bah Pyniaid u la ong ba ka Council ka khmih ba kan ioh pdiang noh shen ia ka kaiphod na ka Delimitation Committee kaba la bynshet ban leh ia kane ka kam.

“Dang ap ia ka kaiphod na ka Delimitation Committee, kaba lah ban aiti noh mynta u bnai, kumba la pynpaw u chairman ka Committee bad ka Council kan ieh beit ha ka jingstad jongka”, u la ong.