Ngi dang sahdien haduh katta katta, ong ka AKHAF “Ym dei ban pynkylla ia ka bhah thungkam ki Khasi Garo”

Shillong:Ka seng All Khasi Hills Achik Foundation (AKHAF) ka la ai jingthoh sha ka Expert Committee halor ka bhah thungkam ka jylla, ba ka bhah kaba la ai ia ki Garo 40 percent kam dei ban kylla bad dei ban pynneh beit.

Hadien ba la aiti ia ka jingthoh sha ka Expert Committee, ka president ka tnad kynthei, ka Serimina D Marak ka la ong ba kan long kaba bha tam, ba ka bhah thungkam hapdeng u Garo bad u Khasi-Jaintia, kan neh kumjuh khlem da pynkylla.

Ka la ong ba ka jaitbynriew Garo ka dang sahdien bha ha kiba bun ki liang bad la kyrpad ia ki paralok Khasi-Jaintia ba ki dei ban sngewthuh ba ki Garo ki dang sahdien ha ka liang baroh naduh ki jaka pule, bad kiwei ki jingdonkam. Halor kane, ka donkam ban pynneh ia ka bhah thungkam kaba rim kumba la leh naduh mynshwa.

“Ngi dang sahdien haduh katta katta ha baroh ki liang, ngi kyrpad ia ki paralok Khasi, ba ia ka bhah thangkam, ym dei ban pynkylla hynrei dei ban pynneh kumba ka long”, la ong ka Serimina.