Leit kyndang ki briew ka tnat Excise ia ka Karkhana ba pynmih ia ka kyiad beain ha Rajabagan Byrnihat

Nongpoh, 26 Jylliew: Ki briew na ka tnat Excise ia kaba la ialam da u Bah R.C Lyngdoh, uba dei ruh u Superintendent of Excise ha ryngkat ka jingdon ki ophisar sorkar na katei ka tnat, hynnin ka janmiet jong ka sngi ba ar,ki la leit ban khynra naphang ia kawei ka Karkhana, ia kaba la la kynnoh ba ka ju shna ia ka Kyiad beain hapoh ka shnong Rajabagan, Byrnihat.

Katei ka jingleit khynra da kitei ki ophisar ka tnat Excise, ka dei hadien ba ki la ioh jingtip, ba ki don ki briew kiba ju shna kyiad beaiñ ha kawei ka Karkhana ha ka thain Byrnihat, kumta haba kitei ki briew na ka tnat Excise, ki la leit ban khynra, ki la lap shisha ia kawei ka Karkhana, ba ki briew ki shna beain ia ka Kyiad, khlem license kaba la trei khlem jingsalia.

Hadien katei ka jingleit khynra kaba kynsan, u Bah R.C Lyngdoh, haba kren sha ki lad pathai khubor u la ong, ba hadien ba ki la ioh jingtip kaba tikna halor ka jingdon ki Karkhana pynmih kyiad kiba long beian bad khlem License ne register katkum ki kyndon Ain, ka kynhun Excise na Meghalaya ha ryngkat ka jingiatreilang bad ka Excise na Asaam, ki la leit ban khynra bad kaba sdang ha ka por 3 baje eiei janmiet ha shnong Rajabagan Byrnihat.

U la ong ruh, ba ha katei ka jingleit ban khynra, ki la lap ia kawei na ki Karkhana kaba ishankhmat bha kaba don ha Rajabagan, kumta haba ki la khynra, ki la lap shisha ia ka jinglehtuh, ha kaba ki la lap ia ki song kyiad phareng kiba dei ban shalan ha Meghalya bad Assam.

U Bah R.C Lyngdoh, u la ong ruh ba ka jingdon jong kiba kum kitei ki Karkhana kiba pynmih beain ia ka Kyaid, ka long shisha ka jingduhnong kaba khraw halor ki kam khajna hapoh ka jylla, namar ka jingdon kiba kum kitei ki Karkhana bym don License ki ban pynmih kyiad bad ban shalan pat ia ki.

Katba na ka liang u Bah Anant Timung, Rangbah shnong ka Rajabagan, u la ong ba na ka liang ka shnong, kam shem la don jingtip eiei ruh em halor ka jingdon jong kiba kum kitei ki Karkhana, kiba shna bad pynmih ia ka Kyaid beain, ha kaba u la ong ruh ba katei ka Karkhana ba la lap da ka tnat Excise ba ka leh ia katei ka kam beain, ka dei kaba la khang naduh u snem 2018.