Ai 80 percent ia Khasi-Jaintia bad Garo, kiba bit kin ioh kam, ong ka HSPDP

Shillong:Ka seng HSPDP mynta ka sngi ka la ai jingmut sha ka Expert Committee on Reservation Policy ban pynduh noh ia ka jingbhah thungkam kaba 40 la 40 percent ia u Khasi-Jaintia bad Garo.

Ka la ai jingmut ba ha jaka kane, dei ban mang bhah beit 80 percent ia baroh kynthup Khasi-Jaintia bad Garo bad ai ba kiba tbit, kin ioh ia ka kam.

U general secretary ka HSPDP mynta ka sngi, u bah Panbor Ryntathiang u la ong ba ka seng ka la ai jingmut ruh ba ia ki kam kiba hap ha ki district, dei ban mang 90 percent ia ki trai shnong Khasi-Jaintia ha ki district kiba don ha rilum Khasi bad Jaintia bad 90 percent ha ki district kiba hap ha rilum Garo.
Ha kaba iadei bad ka jingbhah ha ki jingpule, ka HSPDP ka la ai jingmut ba dei ban bishar bniah halor kane ka bynta, namar ba kam don ka jingbatai shai halor kane ka bynta naduh mynshwa.

Mynta ka sngi, ka HSPDP ka la ai jingmut sha ka Expert Committee halor kane ka bhah thungkam.
“Ngi la ai jingmut ba ka bhah thungkam 40:40 ia u Khasi-Jaintia bad u Garo, dei ban pynduh noh bad dei ban ai beit 80 percent ia baroh kata, u Khasi-Jaintia bad Garo ba kin iakhun katba uba tbit, un ioh ia ka kam”, la ong u bah Panbor.

U la ong ba kane kan wanrah ia ka jingiakhun kaba khuid bad kan iarap ruh ban ioh ia kiba tbit ha ka kam katba kiba kham lah kham tbit.