Shimti biang ka Kong Kurbah kum ka DC East Khasi Hills

Shillong: Ka Sorkar Jylla ha ka sngi Nyngkong, kala wanrah biang ïa ka Kong Rosetta Mary Kurbah kum ka Deputy Commissioner ka East Khasi Hills District.

Ïa ka kong Kurbah la pynkynriah na DC Ophis hashwa ka elekshon Lok Sabha bad la wanrah bujli ha jaka jong ka da u SC Sadhu.
Hadien kane ka jingpynkynriah kam, ka kong Kurbah kala shakri kum ka Secretary ka Tnad Community & Rural Development, Fisheries bad kumjuh ruh kum ka Director ka Community & Rural Development.

Ha kajuh ka por, ïa u SC Sadhu la pynkynriah bad thung mynta kum u Secretary of Community & Rural Development Department, Fisheries Department, Animal Husbandry & Veterinary Department, bad Water Resources Department, bad ruh kum u Director of Community & Rural Development.

U A. Baranwal, Deputy Commissioner ka East Jaiñtia Hills District, Khliehriat, ula shah pynkynriah bad shah thung mynta kum u Deputy Commissioner ka Ri-Bhoi District, Nongpoh.
Kumjuh ruh u S Awasthi, Deputy Commissioner ka South Garo Hills, Baghmara, ula shah pynkynriah bad shah thung kum u DC ka East Jaiñtia Hills District, Khliehriat.