Pyrshah ka dorbar shnong Mawryngkneng ban wanrah ia ka check post

Shillong 21 Jylliew: Ka dorbar shnong Mawryngkneng mynta ka nohphai sngi jong ka 21 tarik Jylliew 2024, ha ba aijingkren ha Shillong Press Club ka la wan ban pynpaw ia ka jingpyrshah halor ka jingthmu ban wanrah ia ka check post ha National Highway. kane ka jingpyrshah ka la mih hadien ba u nongmihkhmat katei ka thaiñ, u bah Heavingstone Kharpran u la kyrshan ïa ka jingthmu ban wanrah ïa kane ka khyrdop talasi ha katei ka thaiñ .

Ha ba kren sha ki lad pathai khubor,nakaliang u bah Peter J. Lawai Sordar ka shnong Mawryngkneng, u la Ong, ba ka jingdon jong kine ki check post ha ki surok bah ne Highway ka pynthud ia ka leit ka wan ki paidbah.

Ki paidbah nongshong shnong man kapor ki la pynpaw ka jingeh nakapor sha kapor ka jingud ban nym buh ia kane ka check post.

Nakaliang ka shnong ka la iakynduh ia ka DGP ha kine ki sngi ba la dep, ban nym wanrah ia kane ka check post. Ka shnong lada jia ba wanrah biang ia kane ka check post kan pyrshah beit, la bynrap u bah Peter.

Ka baar kalong ba ka jingdon jong kane ka check post ki pulit kim don por shuh ban leit sha ki iew ki hat,ne ban leit khynra ha kiwei pat ki jaka kiba don ia ki jingsniew, ki ba bun jait.

U bah Peter u la Ong ruh, ba ha ba don ki jingjia ha poh shnong poh thaw, lada ka shnong ka pyntip sha ki pulit ka bampor da ki katto kattne kynta bad ki bor pulit ki aidaw ruh kim don briew ban phah bad lada kane ka check post kan don shatei sha mawryngkneng hato ki police kin peit ia ka check post ne kin peit tang ia ki jingsniew ba don bapoh shnong.

“Lada jia ba ka Home department bad u MLA kin iaid beit ia kane ka kam ban buh ia ka check post ka shnong kan nym iatreilang shuh bad ka police department”,la bynrap u bah Peter.

Haba ki kwah shisha ban weng ia ki jingsniew, khamtam ka jingdih drok ka ba la Jyllei bha ha ka shnong Mawryngkneng ka la ai jingmut ban buh noh da u wei u ophisar ban peit beit thik iakata ka kam ym ban phah sha kiwei pat.

Shuh shuh u bah Peter u la pynsngew ruh, ha kaba iadei bad ki case ba iadei bad ki kynthei, ki ba bun ki kynthei ki ba leh ia ki kam sniew, ki ba long beain hapoh shnong poh thaw, ka jingia dih ia bam khlem akor,kumta donkam ia ka jingpynkhlain ia ka Women police Cell ban tehlakam ia ki jingnsniew nakabynta ki kynthei ha ka jaka ban buh ia ka check post.