Nga ithuh ia u Saleng kum u Chief Whip ba kyrshan ka VPP, ong u Speaker

Shillong: U Speaker ka iing dorbar thawain ka jylla u Thomas A Sangma u la ong ba u la ithuh ia u MLA ka Gambergre u Saleng A Sangma kum u Chief Whip ka liangpyrshah hapoh ka ïing dorbar, hadien ba ula ioh ia ka jingthoh na u President ka Voice of the People Party (VPP) uba la kyrshan ia u Saleng ban long kum u Chief Whip.

Haba kren mynta ka sngi, u Thomas u la ong ba dei halor kane ka nongrim, ba ula ithuh ia u Saleng katba ia u bah Ronnie V Lyngdoh la iathuh kum u Nongialam Liangpyrshah ha ka iing dorbar.
U Speaker u la ong ba halor kane ka shithi kaba la ioh pdiang na u President ka VPP, la shim ba ka VPP ka la kyrshan ia ka Congress hapoh ka ïing dorbar, bad ula shim ia ka rai ban ithuh ia u bah Ronnie kum u nongialam liangpyrshah bad ia u Saleng kum u Chief Whip.

“Da kaba pynshong nongrim halor kane, ngi la shim ba ka Congress ka ioh ia ka jingkyrshan na ka VPP kaba don 4 ngut, ki don 9 ngut ha ka liangpyrshah kynthup 5 ngut na ka Congress”, la ong u Speaker.
U Saleng uba jop MLA na Gambegre na ka Congress, u la resain ia ka kam MLA hadien ba u la shah jied kum u MP na Tura dang shen.
Halor ka jingduna MLA ka Congress hadien ba la risain u Saleng hadien ba la jop kum u MP na Tura, u Speaker u la ong ba un sa bishar shwa ia kane ka kam.

Lah ban kdew ba ka Congress bad ka TMC ka la jop mar 5 ngut ki MLA hynrei mynshem snem, u Speaker ula ithuh u nongialam ka Congress u bah Ronnie V Lyngdoh kum u nongialam liangpyrshah katba ia u Saleng A Sangma kum u Chief Whip hadien ba ula ioh pdiang ia ka shithi na ka VPP ban kyrshan ia u Saleng ia kane ka kam.