Dei ban pyndep kloi ia ka jingpynbeit thymmai ia ki konstitwensi MDC, ong u bah Bindo

Shillong:U MDC ka KHADC u bah Bindo M Lanong, u la kubur ba ka la dei ka por ban pynbeit thymmai ia ki MDC konstiwensi khnang ban iahap tara katkum ka jingbun briew, namar mynta don kiba la bun briew palat bad don kiba duna pat.

U la ai nuksa, ka Mawlai ka la bun bha ki nongthep vote kumba 40 hajar katba ka Laban ka don tang 12 hajar vote.
Haba kren ha ka 11 tarik Jylliew 2024, u bah Bindo u la ong ba lada lah ban pynbeit thymmai ia ki konstiwensi khnang ba ki vote kin ia wan marjan.

Katkum ka jingong u bah Bindo, ia kane ka jingpynbeit thymmai, la dei ban kham pynkloi.
Lah ban kdew ba ka KHADC bad ka JHADC ki la iaid shait shait ban pynbeit thymmai ia ki konstitwensi jongki, bad na bynta ka KHADC, ka Delimitation Committee ka lah ban aiti ia ka kaiphod jongka la kumno kumno mynta u bnai Jylliew.
U Lat ka jylla u la pynjlan ia ka samoi jong ka KHADC bad ka JHADC sa hynriew bnai na bynta ba kin pyndep ia ka jingpynbeit thymmai ia ki konstitwensi jongki.