Ka jylla ka la bynshet ha ka Congress,VPP ban pynurlong ia ka ILP bad ktien Khasi

Shillong:U myntri ka tnad pule puthi ka jylla u Rakkam A Sangma u la ong ba ki paidbah ka Khasi-Jaintia kila jied ia u kyrtong ka Voice of the People Party (VPP), u bah Ricky Andrew Syngkon ban iasaid ia ki mat ki jura kiba ki paidbah kila khmih lynti kaba khraw.

Haba kren mynta ka sngi, u Rakkam, u la ong ba kum u MP un hap ban iasaid ia ka jingpynurlong ia ka jingdawa ia ka Inner Line Permit (ILP), ka ktien Khasi bad kiwei.
Hynrei lada um lah ban pynurlong, kijuh ki briew kin sa ong pat da kawei ka khana halor jong u.
U la ong ba kum u MP, u bah Ricky un long lang ka bynta ka sorkar ban iasaid ia ki mat ka jylla na ka sorkar India, hynrei ka shong ha u, ha kano ka rukom yn u iaid ka lynti khamtam ha ka sain pyrthei baiar ka ri India.

Ha kajuh ka por, u myntri u la ong ba ki kam sorkar jylla ki lait tang kumba 3-4 hajar tylli ha ka shi snem katba ki samla kiba pyndep ia ka kyrdan degree man u snem ka la long kumba 18-20 hajar eiei.
U Rakkam u la ai khublei ia ki MP kiba dang shu shah jied na Shillong bah Ricky Andrew J Syngkon bad u Saleng A Sangma na Tura. U la kyrmen ba kine ki MP na ka jylla kiban leit sha Delhi, kin lah ban iasaid ia ki jingangnud jong ki paidbah ka jylla.

Katkum ka rekod ka tnad pule puthi, kine ki 15-16 hajar kiba khlem ioh kam, kan dei ka jingtynjuh kaba khraw ia ki nongialam khamtam ia ki seng sain pyrthei kiba la shim kabu na kane ka jinglong jingman ha kaba ki samla ki la shah pawang sohpadoi ha kane ka sain pyrkhat, khamtam kine kiba dang jop elekshon MP.