Dawa ki sengbhalang Jaintia ban kynriah ia U DC,Addl SP na WJH

Jowai, 15 Naiwieng:
Ki Sengbhalang na ri lum Jaintia kiba kynthup ki la ai da ka dorkhas sha u Deputy Chief Minister, uba dei ruh uba peit ia ka tnad pule dangle, u Dr. RC Laloo ban dawa ban pynurlong ia ki mat dawa jong ka KNGCSU bad ruh ban pynkynriah ia u DC bad Add.l SP na West Jaintia Hills.
Ka bor District ka la siat um, siat lyer pynsat khmat bad ruh bom lathi ia ki samla pule ka Kiang Nangbah ha ka 10 tarik une u bnai katba ki dang pynlong ka jingiakhih da ka jingiaid paidbah ban dawa na ka sorkar ban pynurlong ia ki mat dawa jong ki.
Ki sengbhalang bapher bapher ha ka shithi ba la iasoilang bad phah sha u Dy, CM, ki la dawa ban pynurlong ia ki mat dawa jong ka KNGCSU, bansiew bai lut san sha kito ki samla pule kiba la mynsaw bad ruh banweng ia ka ejahar ba la ujor pyrshah ia ki katto katne ki nongialamSengbhalang ki ba kynthup ia ki nongialam ka KNGCSU.