Ba kiar ia ka kali rit, kylla ka trok kit Coke ha surokbah NH-6 ha Nongpoh

Nongpoh, 06 Jylliew: Kawei ka trok kit Dewiong ba la dep sain (Coke) kaba don ia u number NL-01-AD-4856, ka la kylla lyngdang ha surokbah NH-6 ha Nongpoh, ha kaba ka daw jong katei ka jingkylla, ka dei hadien ba u nongniah jong katei ka trok, u la kiar ia kawei ka kali rit, kaba la niah khlem akor hapoh surok.

Katei ka jingjia, ka la jia mynta ka sngi ha ka por 2 baje eiei nohphai sngi, ha kaba katei ka trok ka dei kaba wan na ki thain Jowai ban hiar sha Assam, hynrei haba la poi ha katei ka jaka, u nongniah jong katei ka trok, u pyrshang ban kiar ia kawei pat ka kali rit kaba la niah khlem akor ha u ne u surok bad na kane ka jingkiar ia kane ka kali rit kane ka trok ka la kylla khongpong noh hapdeng u surok NH-06.

Ha katei ka jingjia, u nongniah bad nongbud kim shym la mynsaw bad na ka liang ki bor pulit ka Nongpoh Police Station lem bad ki bor ka National Highway Authority of India (NHAI) ki la poi ha kane ka jaka ban pynkhuid bad tan ia kane ka trok kaba la kylla ha u ne u surok bah.