Pyrshah ka KSU bad bun ki seng ia ka ain shipai

Shillong, 15 Naiwieng:
Ka Khasi Students’ Union (KSU), ka pynpaw biang ia ka jingsngew pyrshah jur jongka, halor ka jing pynjari ia ka ain shipai lane ka Armed Forces Special Power Act (AFSPA), ha Garo Hills, namar ba ka seng, ka sngew ba katei ka ain, kam lah ban wan rah ia ka jingsuk ha Garo hills, hynrei, kan nang pynmih pynban sa shibun bah ki kam pyntriem ha katei ka thain. Katei ka ain, la ong da ka KSU, ba kan pyn mih ia ki kam thombor jong ki shipai, ki jing pynkhein ia ka hok longbriew, ha kaba la iohi, ha kiwei pat ki jingjia ha ki Jylla, ba ka don katei ka ain.
Ha kawei pat ka khubor, na ka liang jong ka Federation For A’chik (FAF), ka All India Garo Union (AIGU) bad ka Unified Peace Movement for Garo Hills (UPMGH), ka ai khublei ia u myntri kam poh iing ka sorkar India, U Kiren Rijiju, ha kaba u sngew iahap, ba dei ban pyrshah ia ka jingkwah jong ka High Court, ban pyntreikam ia ka ain shipai lane ka AFSPA ha Garo Hills jong ka Jylla Meghalaya. La pynpaw ruh ba u paidlang na ki kynhun bapher, ula mih ban ia iaid paidbah bad pynpaw pyrshah halor ka jingthmu ban pyntreikam ia katei ka ain, ha ki bynta bapher jong ka Garo Hills.Kitei ki seng, ki khot ruh ia kito kiba sngew iahap, ba kin ia treilang, na ka bynta ban khanglad ia katei ka jingthmu ban pynjari ia ka ain shipai ha Garo hills, ong ka kyrwoh na U Brimbal M Sangma President ka FAF, U Abirth Marak, President AIGU bad U Insting C Marak President UPMGH.