Na kaba bam ja bad u Tit khlaw, poi Hospital ka Kmie lem bad 4 ngut ki khun na shnong Saiden

Nongpoh, 03 Jylliew: Ka longkmie lem bad 4 ngut ki khun na ka Dong Nongkyndang kaba hap hapoh ka shnong Saiden ha Ri Bhoi, ki la poi Hospital, kiba la ioh jingshitom ba kynsan, kata ka dei hadien ba ki la dep bam ja miet da kaba bam lang bad u Tit khlaw.

Kitei kiba la shitom na kaba bam ia u Tit Khlaw, ki dang don mynta hapdeng ka jingshah sumar ha Civil Hospital Nongpoh bad ha Bethany Hospital Nongpoh, ha kaba ia kiba la kham shitom jur ki don hapdeng ka jingshah sumar ha Bethany Hospital bad ia kiba don hapdeng ka jingshitom kaba malu mala, ki don hapdeng ka jingshah sumar ha Nongpoh Civil Hospital.

Na kitei ki san ngut kiba la shitom jur na kaba bam Tit, 2 ngut ki don hapdeng ka jingshah sumar ha Bethany Hospital Nongpoh, katba kitei kiba shitom malu mala, ki don hapdeng ka jingshah sumar ha Nongpoh Civil Hospital.

Ka jingtip kaba la iohlum, la ong ba katei ka jingshitom ba kynsan jong kitei ki san ngut, ka dei hadien ba ki la dep ban bam ja miet hynnin ka miet 2 tarik u jylliew, ha kaba la ong ba hadien ba ki la dep ban bamja ha ryngkat u Tit ki la kem shitom bad kaba la hap ban rah mar mar sha ki jaka sumar.