Pynkup burom ka Kur, ia ka Kong Idashisha Nongrang, kaba bat ia ka kyrdan DGP

Nongpoh:Ka Kur Nongrang kiba dei na ka kpoh jong ka Kong Thiabon Nongrang (Bam kwai ha Dwar u Blei), ki la pynlong ia ka jingialang ban pynkup burom kaba kyrpang ia ka Kong Idashisha Nongrang, kaba dei ka longkmie Khasi kaba nyngkong eh ban ioh bat ia ka kyrdan Director General of Police (DGP) ka kyrdan ba hakhlieh duh hapoh ka tnat ki ki Pulit ha ka jylla.

Ia katei ka jingialang ban pynkup burom ia Kong Idashisha Nongrang, la pynlong ha ka ing jong ka Kong Marbha Nongrang ha shnong Umbir, Ri Bhoi District, ha kaba lyngba katei ka sngi, ba la pynkup burom ia katei ka heh Pulit ha ka jylla, la sakhi da ka jingdon ki nongialam jong ka kur Nongrang ba kynthup ia u Bah Switbert Nongrang, Rangbah Kur, u Bah Diwarson Nongrang lem bad kiwei.

Ki nongialam ka Kur Nongrang haba ki ai jingkren ha katei ka sngi, ki la ki la pynpaw ba kum ka Kur hi, ki dap da ka mynsiem jong ka jingkmen bad ka jingsarong halor ka jingioh jong ka Kong Idashisha Nongrang ia ka kyrdan DGP hapoh ka jylla bad kiba la pynpaw ba ka la long kum ka nuksa ia kiwei pat, namar lyngba ka jingtrei shitom bad trei minot ban poi sha ka thong jong ka nam bad jingjop.

Lyngba jong katei ka sngi ba ki la pynlong ia katei ka jingpynkup burom, na ka liang ki nongialam ka Kur Nongrang, ki la ai ia ki tien sneng tien khraw ia ka Kong Idashisha Nongrang, namar wat hapdeng shibun ki jingtynjuh kiba wan ha ka por ba ka ai ia ka jingshakri sha ki paidbah, hynrei ka dei pat kaba ju iai kynmaw ia U Blei, ban pan ia ka jingshemphang na U, ban trei lyngba ka lynti jong ka hok bad ka jingshisha, na bynta ki paidbah ka jaidbynriew bad ka jylla hi baroh kawei.

Ka Kong Idashisha Nongrang, haba ka jingkren ha katei ka sngi, ka la pynpaw nyngkong eh ia ka jingsngewnguh sha ka Kur kaba la shim ia kane ka sienjam ban pynkup burom, watla na ka liang jong ka Kong Idashisha Nongrang kam kwah ia kaba kum katei ka jingshah pynkup burom.
Ka Kong Idashisha Nongrang, ka la pynpaw ruh ba ka khlem poi pyrkhat ba ka kan poi shaduh kane ka kyrdan ban long kum ka hehduh ha ki Pulit ha ka jylla, kumta ha ki jingkren jong ka, ka la pynpaw ruh ia ka jingsngewnguh sha uwei na ki bahaing, uba la ju ai mynsiem bad pynshlur ia ka bad ruh khamtam ia U Blei ba dei lyngba ka jingkyrkhu bad ka jingialam lynti ka jong u Blei, ba ka sa lah ban poi sha kane ka thong.