Nalor ka twa surok, sa ka jingdum tliw, la 5 sngi sha thain Pynursla

Shillong:Mar ia ther u lapbah sha thain Riwar, la twa ka surok, ha kiba bun ki jaka naduh na rum Laitlyngkot ter ter, kaba la pyndik, ia ka iaid ka ieng bad ka leit ka wan ki paidbah ha kine ki sngi.

Hynrei kam kut tang katta, ka jingshai jong ka ding ilektrik, ruh, ka la jah syndon jar, sha ka thain baroh kawei bad la iathuh, ba naduh ka 29tarik haduh mynta ka sngi, ka thain Riwar Mihngi, ka shong ha ka jingdum.

U bah P Kongwang Sordar ka Raid Mukertila, haba iakren bad U Rupang, u iathuh, ba ka jingduh ding ilektrik, ka la sdang naduh ka 26tarik Jymmang 2024 ha ka shnong Umsyiem bad kiwei de ki shnong ba marjan bad la iathuh ba haduh mynta ka sngi ruh, katei ka shnong, kam don ding ilektrik satia.

Ha Pynursla, la iathuh ba ka jingduh ding, ka sdang naduh ka 27tarik mynta u bnai bad ki trai shnong, ki iathuh ba ka don ka jingkhyllem dieng bad ka jingdkut ki sainar ilektrik, ha katei ka thain, na ka jinghap slap kaba jubor ha ki khyndiat sngi ba ladep, kaba la pynlong ia ka thain baroh kawei, ba kan duh ding ilektrik.
Lah ban pynkynmaw, ba ka SDO (Civil) jong ka Pynursla, ha ki khyndiat sngi ba ladep, ka la ai jingmaham ia kiba iaid ba ieng bad kiba leit ba wan, ba kin husiar ia ka leit ka wan, ha ka surok na Shillong sha Pynursla, khamtam ha ka por mynmiet.